“Tuir planu Governu kona-ba desentralizasaun podér lokál hahú iha semana mai ne’e hau atu sai munisípiu ida loron ida to’o 18 marsu,” Dehan PM Xanana ba Jornalista sira, hafoin enkontru semanál ho Prezidente Republika, José Ramos Horta, iha Palásiu Governu, Bairo-Pité, Kinta (19/02).

PM Xanan haktuir, Ministériu Administrasaun Estatal (MAE) hahu tiha ona avaliasaun ba servisu sira-ne’ebé hala’o iha munisípiu sira, ne’ebé iha erro no iha ne’ebá iha kapasidade atu hato’o iha vizita ne’e karik.  Tanba, agora ne’e atu ba ultima vez to’o iha fim de terseiru trimestre avaliasaun halo nafatin ba munisipiu sira, nune’e Governu bele deside.

Nia informa, avaliasaun ba munisipiu sira liu husi finansas, administrasaun, planeamentu no seluk tan, entaun buat sira ne’e hotu mak foin bele deside munisipiu ne’ebé mak bele tama iha eleisaun munisipál iha tinan 2027.

“La’ós (munisipiu) tama hamutuk hotu, ita fó ezemplu munisipiu A seidauk, Munisipiu B ne’e diak ona, nia tama ona ba (eleisaun), Munisipiu C no D seidauk, Munispiu E di’ak, prontu tama ona (eleisaun),” Nia afirma.

Nia afirma, Governu halo neneik hodi desentralizasaun la’o dadauk ona, Governu lokal mos la’o hodi povu rasik mos partisipa, haree no hatene komprende ezekusaun orsamentu ne’e la’o hanusa, planeamentu ne’e la’o hanusa.

“Tanba la’e, mai hotu Governu sentral,  ita haree Suku husi Tutuala nian to’o Oé-kusse, Tasi-feto to’o Tasi-mane, buat hotu dehan  ne’e ami nian, tanba buat hotu sente katak ami nian ne’e mak importante no ami nian ne’e mak tenke haree kedas ona, urjentu liu,” Tenik PM.

Maibé implementa ona desentralizasaun podér loka, PM fundamenta, iha munisipiu laran, Postu Administrativu sira, Suku no Aldeia sira hamutuk planu prioridade ida ne’ebé importante atu implementa uluk no ida ne’ebé mak implementa tinan tuir mai fali.

“Hanesan saúde, estrada, eletrisidade, agrikultura, turizmu, buat sira ne’e hotu. Ne’ebé hau informa ba Prezidente katak hau sei sai ba munisipiu hodi haree kondisaun,” Nia konklui.