Iha enkontru armonia kuaze oras ida ne’e, Ministra Penny Wong tatoli viazen servisu mai Timor-Leste hodi kongratula Kay Rala Xanana nu’udar Primeiru Ministru IX Governu Konstutusionál kontinua hametin kooperasaun.
“Primeiru Ministru Xanana ema ne’ebé di’ak no sempre ko’alia ba interese Timor-Leste nian. Ha’u hato’o ona ba Primeiru-Ministru Xanana vontade husi Austrália hodi hamutuk ho Governu foun realiza futuru Timor-Leste nian no Austrália prontu nafatin atu apoia ekonomia no dezenvolvimentu Timor-Leste,” informa Ministra Penny, iha komunikadu ne’ebé Online INDEPENDENTE sita, sesta ne’e (07/07).
Austrália dezde uluk sai belun di’ak ba Timor-Leste no iha komprimisu no domin boot atu servisu hamutuk ho Governu Timor-Leste hodi kontinua apoia dezenvolvimentu ekonomia.
Iha fatin hanesan, Xefe Governu, Xanana Gusmão rekoñese Ministra Penny Wong nu’udar ninia belun di’ak no koñese didi’ak povu no nasaun Timor-Leste nia situasaun moris.
“Ministra ne’e amiga ida di’ak tebtebes, ba ita-nia rain ami ko’alia nivel aas de’it tanba Governu dadaun diskute hela programa, no lori ba Parlamentu aprova tiha maka foin bele diskute,” tenik nia.
Xefe Governu akresenta, bainhira programa IX Governu nian aprova tiha maka kada setór bele hahú kontaktu ona Austrália ba disponibilidade hodi apoia Timor-Leste.
“Ministra Penny Wong dehan sei fó ba ita-nia dezenvolvimentu iha saida de’it mak ita presiza. Ne’e duni, ami ko’alia barak, no ha’u hato’o obrigado barak ba ministra, tanba ami nia enkontru ne’e diak tebe-tebes, ministra hatudu loloos ninia amizade, solidaridade, nia amor, nia domin ba rai ne’e no povu ida ne’e,” Xanana agradese.
Ministra Negósiu Estranjeiru Austrália hasoru Xanana Gusmão akompaña husi Ministru Negosiu Estranjerus, Benditos Freitas,Embaixadora Timor-Leste iha Austrália, Inês Almeida no Austrália nian maka Enkarregadu Negósiu Departamentu Negósiu Estranjeiru Austrália (DFAT), Caitlin Wilson no entidade seluk.
Enkontru ne’e termina ho Xanana entrega tais Timor no kafe Timor ba Ministra Penny ho nia delegasaun, enkuantu Ministra Penny mós entrega hikas xapeo kaboy ida ba Xanana.
