Xefe Planeamentu iha MTK no Embaixadór ba Ema ho Defisiénsia Marsal Pinto hatete, tinan ida ne'e (2023), MTK sei halo rampa ba ema ho defisiensia sira ne'ebé lao ain iha fatin tolu (3).
“Governu ida ne'e iha komitmentu, ami tau ona orsamentu atu halo tan rampa iha fatin tolu (3), mak ida iha MTK nia oin, iha Akanunu fatin halo sim transporte nian no ida iha Komoro, insepensaun nia oin,” dehan Xefi Planeamentu iha salaun MTK Kaikoli, Sesta (07/07).
Xefe dehan, iha implementasaun kona-ba Planu Asaun Nassional (PAN), iha tinan 2022, sira kria uluk ona rampa ida iha Diresaun Nasioanal Transporte Terestre (DNTT) Balide hodi fasilita EhD sira ne'ebé mak uza ai-tonka no kadera roda sira.
Embaixadór esplika, MTK mós sai hanesan promotor no protetor ba EhD, tanba ne'e iha Planu Asaun Nasional defisiensia nian, MTK halo ona atividade barak implementa ona iha munisipiu sira, hanesan oinsá halo sosializasaun rodaviariu ba EhD sira.
“Ami halo sosializasaun oinsa mak sira bele asesu ba iha zebra kros no sinais tranzitu sira ne'e no sosializasaun ne'e ami halo ona iha munisipiu Kovalima, Manatuto, Lautem no Vikeke iha tinan 2021 ho 2022.
Nia dehan, iha tinan 2023, MTK nafatin iha komitimentu no iha ona orsamentu, atu nune'e kontinua halo sosializasaun iha munisipiu Ainaro, Emera no Maliana, nune'e EhD sira bele iha koñesimentu atu asesu ba iha asebilidade sinais tranzitu rodaviariu sira.
