Primeiru-Ministru Xanana Gusmão konsidera Brunei Darussalam nuudar nasaun membru Association of Southeast Asian Nation (ASEAN) ne’ebé iha kooperasaun di’ak mós ho Timor-Leste bele servisu hamutuk hodi fó apoiu ba Timor-Leste.

“Enkontru armonia ne’e realiza hafoin PM Xanana no Liurai Brunei Darussalam, Hassanal Bolkiah ho lideransa ASEAN partisipa  konferensia nivel altu ka Konferensi Tingkat Tinggi (KTT) ba dala-43 ASEAN iha edifisiu Plenary Hall, Jakarta Convention Center (JCC), Jakarta”, Online INDEPENDENTE sita iha komunikadu (05/09).

Xefe Governu Xanana husu atu Liurai Brunei Darussalam, Hassanal Bolkiah bele fó apoiu ba Timor-Leste iha setór saúde, edukasaun, petroliu no minerais no área importante seluk tan.

Entretantu, Liurai Hassanal Bolkiah mós ho kontente konvida direita PM Xanana bainhira iha tempu bele vizita ba Brunei Darrusalam no PM Xanana agradese no sei ko’alia ho PR Ramos-Horta iha selebrasaun festa 20 de Maiun 2024 bele konvida Liurai Brunei Darrusalam vizita mós Timor-Leste.

Enkuantu, durante enkontru, Xefe Governu Xanana akompaña husi Vice Primeiru-Ministru no Ministru Koordenador ba Asuntu Ekonomiku, Ministru Turizmu no Ambiente, Fransisco Kalbuadi Lay, Ministru Negosiu Estranejerus no Kooperasaun, Bendito dos Santos Freitas, Ministru Interior, Fransisco Guterres, no Vice Ministra Negosiu Estranerus Asuntu ASEAN,Milena Rangel.