Primeriu Ministru Kay Rala Xanana Gusmão hatete, hodi povu Timor-Leste nia naran entrega sertidaun RDTL hodi rekoñese Sekretariu Jeral nu’udar sidadaun timoroan.
“Hodi povu Timor-Leste nia naran, ami entrega Sertidaun RDTL ida-ne’e hodi rekoñese ita nu’udár Timorense,” dehan Xanana Gusmão liu husi Komunikadu ne’ebé Online INDEPENDENTE sita, Kuarta (25/09).
Sekretariu Jeral Antonio Guterres, hola parte iha istória Timor-Leste no ninia vizita mai Timor-Leste nakonu ho ksolok ne’ebé marka konkluzaun ida ne’ebé signifikativu no konsidera Timor nu’udár país domin na’in no páz nian.
Iha fatin hanesan, António Guterres ne'ebé hetan ona títulu sidadania hanesan Timor-oan sente orgullu no hatudu apresiasaun bá ospitalidade ne'ebé nia simu durante hala’o vizita mai Timor-Leste, hodi partisipa iha komemorasaun tinan 25 konsulta populár ne’ebé organiza hosi ONU iha tinan 1999.
“Ha’u sente orgullu no konsidera hanesan onra boot hodi sai sidadaun bá rai ida ne’ebé ha’u sempre lori iha ha’u-nia fuan,” Guterres agradese.
António Guterres moris iha Lisboa-Portugál iha tinan 1949 no kaben ho Catarina de Almeida Vaz Pinto no sira iha oan na’in-rua.
Antes ne’e Estadu Timor-Leste (TL) atribui nasionalidade bá António Guterres iha ámbitu serimónia solene komemorasaun loron konsulta populár bá dala-25 (30 Agostu 1999 – 30 Agostu 2024), iha Parlamentu Nasionál (PN) ho rezolusaun ida ne’ebé asina hosi Prezidente Parlamentu Nasionál (PPN), Maria Fernanda Lay.
Entertantu, Sertidaun RDTL ne’e PM Xanana entrega direta bá António Guterres nia liman iha nia servisu fatin Kuartél Jerál ONU, hafoin abertura Simeira kona-bá Futuru iha Sesaun bá dala-79 Assembleia Jerál Nasaun Unidas (AGNU sígla portugés).
Hafoin entrega sertidaun ne’e, Xefe Governu Xanana Gusmão ho Guterres hala’o mós diskusaun kona-bá Simeira ONU nian, inklui fahe hanoin bá malu kona-bá problema multilateral nian, mantein páz bá nasaun hotu-hotu hodi kumpre prinsípiu demokrasia no respeita direitus umanus sidadaun sira nian hodi lori nasaun sira avansa bá dezenvolvimentu.
ONU mós komprometidu atu kontinua apoia dezenvolvimentu Timor-Leste liu-hosi ninia ajénsia sira ne’ebé hala’o servisu besik ho povu no Estadu Timor-Leste.