Nia dehan, Komité Revizaun Polítiku mak iha kompeténsia hodi verifika alokasaun estratéjika kona-ba rekursu submisaun orsamentál nian, ho objetivu atu atinje kompromisu no objetivu sira ne’ebé hatuur iha dokumentu estratéjiku no analiza kapasidade atu ezekuta planu ba tinan finanseiru 2024 nian.
"Hotu-hotu hatene katak loron kinta-feira hasoru malu ho Prezidente Repúblika José Ramos Horta, Xefe Estadu sai ba li'ur ba reprezenta Timor Leste iha assembleia Nasaun Unidas, iha kontaktu sira barak kapás tebe-tebes, depois ba fali Uniaun Emiradu Árabe (UEA) mós ko'alia ho ema bo'ot sira iha ne'eba. Ema hotu kontente hodi koñese situasaun iha rai ne'e, ita hakarak halo saida buat sira ne'e hotu. Ne'eduni ha'u iha komité revizaun orsamentu 2024 ne'ebé ha'u ulun faktu moras tebes, ita lalika husu malu fali," dehan PM Xanana, iha Palasiu Prezidensia, Bairru-Pité, horisehik.
Nune'e, reuniaun Komité Revizaun Orsamentál nian hala’o ona hosi loron 24 fulan-Outubru to’o loron 9 fulan-Novembru, iha Auditóriu Ministériu Finansas nian.
Alende idan ne’e, Prezidente Repúblika José Ramos Horta atualiza mós ba PM Xanana kona-ba partisipasaun Timor-Leste iha Asembleia Jerál Nasoes Unidas (ONU) ba dala- 78 hodi aprezenta multilateralizmu, progresu Timor-Leste nian.
“Ita agradese progresu barak Timor-Leste nian hato’o iha Asembleia Jerál Nasoes Unidas (ONU) ba dala- 78, iha kontaktu barak, kapas teb-tebes, ema hotu- hotu kontente hodi hatene situasaun iha rai ne’e,”dehan PM Xanana.
Iha ekontru ne’e, PR Horta informa mós ba PM Xanana kona-ba partisipasaun Timor Leste iha simeira ASEAN-GCC ba dala IV iha sidade Riyadh, Reinu Arabia Saudita.
Durante vizita iha Estadu Federál Uniaun Emiradu Arábe (UEA) PR Horta hasoru malu ho Omólogu UEA, Liurai Sheik Mohamed Bin Zayet Al Nahyan no entidade boot sira no setór privadu sira hodi hametin kooperasaun bilaterál rai rua ba futuru.
Tanba ne'e, Primeiru Ministru agradese ho enkontru ne’e sei fó oportunidade di’ak ba Timor Leste hodi haluan ninia lasu kooperasaun iha setór importante sira ne’ebé sei fó benefisiu ba ekonómia nasaun.
Entretantu, Prezidente Repúblika José Ramos Horta informa, ohin enkontru ho Primeiru Ministru ne'e la ko'alia kona-ba atividade seluk tanba nia stress loos ho bazed orsamentu, ne'eduni fó de'it relatóriu kona-ba Xefe Estadu nia viajen ba Arabia Saudita Uniau Emiradu Árabe (UEA) apoiu konkretu ne'ebé Emiratu hakarak fó ba Timor Leste, Arabia Saudita iha setór ne'ebé Timor Leste deside, Primeiru Ministru, governu mak deside.
Nia haktuir, depois ko'alia Primeiru Ministru tenke ba fali Dubai 28 konferênsia bo'ot mundiál ba meiu ambiente. Se Xefe Governu bele ba, Xefe Estadu prefere nia mak ba, tanba nia mak Primeiru Ministru atu halo desizaun ruma, Primeiru Ministru bele halo kedas, enkuantu Xefe Governu ba, Xefe Estadu bele rona, bele ko'alia fó ideas mas labele asina komprimisiu ruma.
Maibé, Primeiru Ministru okupadu demais ba orsamentu, entaun simeira mundiál iha COP28 iha Dubai se mak ba, nia hatete ita ba entaun konfirma mak ida ne'e. Sei koordenadasaun ho membru governu relevante ba iha setór ida ne'e, depois maun bo'ot sei ba simeira ASEAN nian ho Japaun iha fulan Dezembru. Entaun kontente Primeiru Ministru mak ba tanba momentu ne'e liu tiha ona orsamentu.
Alende ne'e mós simu mós konvite atu ba festa indepedénsia tinan 50 Giné-Bisau nian, hakarak maun bo'ot Xanana mak ba, tanba ema iha ne'eba admira maun bo'ot maka'as, Timor Leste fó apoiu maka'as ba estabilizasaun Giné-Bisau nian.
Tanba, sira hotu-hotu hakarak simu maun bo'ot Xanana ne'e impossivel iha 16 Novembru, Xefe Estadu mós labele ba, entaun la hatene se mak bele ba.
