Enkuantu, lideransa orgaun suku mak hanesan, xefe suku, xefe aldeia, delegadu no delagada, reprezentante joven feto no mane no mós lian nain ida.
Tuir observasaun Online INDEPENDENTE iha terenu nota katak, iha Kapital Dili no mós ba iha Munisipiu, komunidade sira antusiazmu forma hodi ezerse sira nia direitu votu ba iha lideransa komunitária.
Tuir observasaun haree katak, eleitor sira hahu forma iha sentru votasaun hahu tuku 07:00 dader.
Enkuantu, tuir orariu, votasaun ne'e hahu iha tuku 09:00 no remata iha tuku 15:00 oras Timor-Leste.
Nune’e, mós parte seguransa sira hala’o sira nia knar tuir duni orientasaun husi komando Polisia Nasional Timor-Leste.
Enkuantu, tuir dadus ne’ebé STAE rejistu to’o iha fulan-Jullu tinan ne’e, total elitór sira hamutuk 893.838 kompostu husi eleitór sira husi diaspora hamutuk 1.853 no iha rai laran hamutuk 58.756.
Husi númeru ne’e, eleitór iha Aileu hamutuk 35.128, Ainaro 48.185, Ataúro 4.288, Baukau 99.724, Bobonaro 72.951, Covalima 49.469, Dili 191.450, Ermera 85.593, Lautem 49.577, Likisa 53.286, Manatuto 36.651, Manufahi 42.310, RAEOA 54.645 no Vikeke 58.756.
Entretantu, rekorda katak, Eleisaun ba orgaun suku ba tinan ida ne’e hetan partisipasaun maka’as husi komunidade sira.
Tuir dadus husi Sekretariadu Tekniku Administrasaun Eleitoral, iha Timor-oan na’in 2.117 mak kandidata an ba Xefe Suku.
Husi total númeru kandidatu Xefe Suku husi suku 442 iha teritoriu Timor-Leste, mane iha na’in 1.876 ka 88,62% no feto na’in 241 ka 11,38%.
Diretór Jeral Sekretariadu Tekniku Administrasaun Eleitoral (STAE), Acilino Manuel Branco informa, ba eleisaun orgaun suku ba tinan ida ne’e, total kandidatu ba Xefe Suku hamutuk na’in 2.117.
Husi númeru ne’e, kandidatu mane iha 88,62% ka na’in 1.876 no kandidatu feto iha 11,38% ka na’in 241.
"Ita seidauk hatene númeru kandidatu xefe aldeia, delegadu/delegada, no ita mós seidauk hatene númeru kandidatu lia-nain no reprezentante feto-mane, tanba ita sei tuir nia faze sira ba to'o iha ne'ebá," informa Acilino ba jornalista Jornal INDEPENDENTE bainhira partisipa iha seremonia distribuisaun material eleisaun suku iha edifisiu Ministériu Administrasaun Estatal (MAE), Kaikoli, Dili, Segunda (23/10).
