Deskusaun Jornada Orsamentu OJE 2024 ho tema “Kontinua Konsolida no Transforma Prestasaun Servisu liu hosi Hadia Sistema Jestaun no Estratéjiku Investimentu” sei hala’o loron tersa-feira 12 Setembru 2023 lidera hosi Primeiru-Ministru Xanana no partisipa hosi membru governu no instituisaun estadu nian hotu.
“Ha’u mai informa ba senhora prezidente no vice prezidente kona-ba preparasaun kalendáriu Orsamentu Jerál Estadu 2024, katak, aban iha salaun Ministériu Finansas sei simu ema hotu- hotu komesa deskute jornada orsamentu,” informa PM Xanana ba jornalista iha Parlamentu Nasionál, segunda ne'e (11/09/23).
Tuir agenda deskusaun sei hala’o hahú oras 08:00 too 17:00, no hahú Sesaun -I, sei halo abertura jornada orsamentu lidera hosi Primeiru-Ministru Xanana, Ministra Finansas, Santina José Rodriques Ferreira Viegas Cardoso no Vice Ministru Finansas, Helder Lopes hodi introdus matéria deskusaun.
PM Xanana hatutan, hafoin halo deskusaun ba kalendariu orsamentu ne’e, governu liu hosi Konsellu Ministru sei halo rezumu ba programa no orsamentu tomak molok aprezenta ba Parlamentu Nasionál.
Iha fatin hanesan, Prezidente Parlamentu Nasionál, Maria Fernanda Lay informa Parlamentu Nasionál kontinua hala’o nafatin ninia funsaun tuir lei, bainhira governu halo tiha deskusaun bele aprezenta ba Parlamentu Nasionál hodi tau iha agenda ba deskusaun iha plenaria.
