PM Xanana dehan, 2026 tinan mudansa, katak mudansa iha atitude, kompromisu no iha buat hotu-hotu, nune’e husu ba ema hotu-hotu atu servisu ba didi'ak ba rai ida-ne'e .
“Tinan 2026 ne’e la’ós fásil bá ita. Tanba ne’e ita buka kurize nafatin atu povu fiar katak hetan tiha ukun-an, oan sira ne’ebé bá servisu hanoin netik sira-nia moris, hanoin netik rai ne’ebé ema rihun atus bá atus fó tiha sira-nia vida la husu buat ida. 2026 tinan mudansa, katak mudansa iha atitude, kompromisu no iha buat hotu-hotu nune’e povu bele senti katak sira-nia oan ne’ebé sai matenek, kaer servisu hanoin duni rai ida-ne’e, la’ós hanoin de’it sira-nia an no família,” PM Xanana husu, bainhira prezide serimónia isar Bandeira Nasionál semana da-huluk fulan Janeiru 2026, iha Palásiu Governu, segunda (05/01).
Xefe Governu husu atu kurize erru sira tanba hafoin semana rua férias hodi festeza Natál tinan 2025 no tinan foun 2026, agora bá oin hahú fali servisu prinsipál, nu’udár sarani no Timoroan ne’ebé hetan responsabilidade tenke hanoin saida mak halo tiha ona.
"Ida-ne’e mak responsabilidade bo’ot bá servisu na‘in sira Estadu tomak iha tinan 2026", dehan PM.
Primeiru Ministru, konsidera tinan 2026 importante tebtebes tanba sempre temi bebeik kona-bá halo korresaun bá administrasaun públika, tenke halo duni. Tanba Povu sei hadomi no respeita ajente administrasaun Estadu tomak bainhira hatudu servisu di’ak bá sira.
“Tanba ne’e husu bá imi hotu, bá imi-nia responsável sira administrasaun tomak, tenke servisu ho di’ak, responsabilidade ho hanoin ida, objetivu ida servi rai no povu ida-ne’e. Husu imi-nia kompromisu. Fulan tolu mak laiha mudansa iha ita-nia hahalok no iha servisu laran entaun ita lalika iha tán serimónia hasa’e Bandeira Nasionál,” Xefe Governu apela.
PM Xanana adianta, iha kalan 31 Dezembru 2025, taka Konta Jerál Estadu (KJE) presiza kurize tanba iha fatin balun ezekuta 75% maibé iha fatin balun ezekuta de’it 50%, tanba ne’e tinan 2026 tenke kurize nafatin hodi halo di’ak liu tán.
Entretantu, partisipa iha isar Bandeira Nasionál iha palásiu Governu, ne’e maka funsionáriu sira hosi Gabinete Primeiru-Ministru, Gabinete Fronteira Marrítima no Terrestre, Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Prezidénsia Konsellu Ministru, Ministériu Koodenadór Asuntu Ekonómiku (MKAE), Gabinete Vise Ministru Asuntu Parlamentár, Sekretaria Estadu Igualdade (SEI), Sekretaria Estadu Komunikasaun Sosiál (SEKOMS), Komisaun Funsaun Públika (KFP), Sentru Nasionál Chega (CNC, sigla portugés), Inspesaun Jerál Estadu (IGE) no Institutu Defeza Nasionál (IDN).
