Xefe Gabinete Kontrolu Kualidade, Hospitál Nasionál Guido Valadares, Armenia da Conceição hatete, HNGV kontinua esforsu atu kombate barata iha ospital laran.

“HNGV servisu hamutuk ho empreza internasionál ida iha tinan 2017 atu kombate barata iha ospital nian no lakon duni, maibé ikus-ikus barata mosu fila fali, entaun ami hanoin katak ospital mezmu gasta osan barak, maibé la konsege rezolve problema barata," dehan Armenia ba jornalista sira iha nia kna'ar fatin, Bidau, Segunda (05/01).

Iha 2024, nia hatutan, HNGV foti medida halo limpeza jeral hodi bele halakon barata sira ne’ebé mak iha armari ne’ebé mak tau iha pasiente sira-nia fatin.

"Konsellu Diretivu HNGV foti ka hasa'i sirkular ida hodi fahe ba pasiente no nia familia sira kona-ba banhira lori hahán mai iha HNGV, karik labele lori barak liu no bainhira iha hahán restu sira labele soe arbiru lixu sira no labele so'e iha bee dalan," nia dehan.

Ho ida ne’e mak fó impaktu atu dada fila fali animál sira ne'e mai iha armari, tanba ne'e Konsellu Diretivu fó sai sirkular ida ba atu ema hotu tenke halo tuir.

“Informasaun nafatin ami ko’alia ba pasiente sira, bainhira halo kontrolu ba infermaria sira nafatin fó informasaun ba pasiente sira, maibé dala-barak buat sira ne’e akontese nafatin signfiika barata sira ne’e iha.”

“Entaun husi meius ne’e ami nafatin iha sirkular husi Konsellu Diretivu katak limpezador  sira nafatin iha limpeza ba armari sira, hasa'i hotu ba li'ur fase, hamaran no sira uza ai-moruk rahun hodi nune’e hamate barata sira."

Nia husu ba familia pasiente sira atu lori hahán mai labele barak nune’e evita barata mosu iha HNGV.

“Tanba banhira lorihahan barak mai mak soe arbiru no bele hamosu barata mosu fila fali. Limpezador sira kontínua hamoos fatin ka unidade sira ne’ebé iha, no kontinua hamoos tuir prosedurne’ebé mak iha hahú husi armari, rai, kama, haris fatin to’o ba pesoal saúde sira-nia fatin,” dehan nia.

Molok ne’e, iha video ida ne'ebé mak virál iha média sosiál katak iha barata barak loos iha gaveta iha HNGV ne'ebé mak tama ba pasiente sira nia hahán.

Hakarak  lee notisia kompletu no notisia seluk tan bele asesu link e-paper INDEPENDENTE:https://digital.independente.tl, edisaun segunda (05/01).