Ministru Interiór (MI), Francisco da Costa Guterres hatete, nomeasaun ida-ne'e bele renova dala ida ba períodu hanesan, tanba nia iha abilidades téknikas, aptidaun no esperiénsia profisionál ne'ebé presiza hodi hala’o knaar ne’e.
“Ami halo selesaun no hanoin katak senora Natércia Eufrásia ne'e ema di'ak, entaun ami propoin mai iha Konsellu Ministru no ohin Konsellu Ministru aprova ona no nia sei hahú servisu iha janeiru ne'e to'o tinan tolu tuir mai,” Dehan Ministru Francisco, iha Palásiu Governu, Kuarta (07/01).
Ministru esplika, nomeasaun ida-ne'e, hodi konsidera dezafiu kontemporáneu sira iha kontrolu migrasaun nian, inklui aumentu iha mobilidade umanu, dezafiu sira-ne'ebé mosu relasiona ho seguransa sibernétika no terrorizmu transnasionál, no mós nesesidade atu promove ambiente ida ne'ebé favoravel ba turizmu.
Nune’e mós investimentu no dezenvolvimentu ekonómiku sustentável, ne’ebé Governu konsidera hanesan iha vantajen hodi nomeia polísia ida hosi Polísia Nasionál Timor-Leste ne’ebé iha esperiénsia no komandu ne’ebé sufisiente atu dirije Servisu Migrasaun.
Governante ne'e fiar , Superintendente-Xefe Polísia Nasionál Timor-Leste, Natércia Eufrásia Soares Martins sei hala'o servisu Imigrasaun nia ho di'ak liután.
“Komandante Natércia ha'u fiar nia sei mai ajuda di'ak liután, servisu imigrasaun, nia halo kontrolu di'ak liután no hamutuk servisu ho di'ak liután,” Nia haktuir.
