PM Xanana hato’o apresiasaun ne’e ba manorin voluntariu na’in lima ne’e bainhira hala’o vizita supreza hodi partisipa selebrasaun aniversáriu Eskola São Francisco de Assis “PAZ E BEM” iha Aldeia Hatumasi, Suku Leotala, Postu Administrativu Likisa, Munisípiu Likisa.

Vizita ne'e PM Xanana halo hafoin simu karta husi Fundadór Eskola São Francisco de Assis, Rui Fernandes Manuel Chamosco, hodi relata preokupasaun ne’ebé estudante no inan-aman sira hasoru.

Eskola ne’e harii husi Associação de Amigos Solidárioa com Timor Leste (ASTIL-Portugál), iha tinan 2019 ho sala aula tolu, haris-fatin ida, ne’ebé inaugura iha 10  Marsu husi fundadór ASTIL, João Crisóstomo e Criança de Boebua. Eskola ne’e harii ho intensaun ajuda estudante sira iha área rurál asesu ba edukasaun ho besik liu tán.

“Ha’u mai tanba imi-nia eskola selebra tinan hitu, ha’u mai atu agradese ba Avó Rui Fernandes Manuel Chamosco ho nia maluk sira ne’ebé ho laran boot, fuan boot hodi ajuda mós governu atu hadia edukasaun no prepara ita-nia oan sira-nia edukasaun.”

“Ha’u mós hakarak apresia mós ba Pai Nino (João de Araújo) ho profesór no profesora sira laran luak hodi haree ba imi-oan sira-nia futuru. Sé ho voluntáriu hanesan ne’e mak profesór Timor-oan hotu-hotu bele kontribui atu hadi’a ita-nia rain,” dehan PM Xanana liu husi komunikadu ne’ebé INDEPENDENTE asesu, Segunda (24/03).

Xanana hatete, Ministériu Edukasaun (ME) rezolve hela problema edukasaun no problema profesór sira. Maibé iha área rurál hanesan iha Aldeia Hatumasi, profesór sira hanorin voluntáriu tinan hitu ona, nunka reklama sira-nia direitu mais sakrifika a’an atu hanoin de’it oinsá mak fahe sira-nia matenek ba estudante sira-nia futuru, no ida ne’e asaun fraternidade importante ida.

PM Xanana ne’e apela ba estudante sira atu badinas estuda, mezmu sira iha área rurál hasoru dezafiu oioin.

Iha biban ida ne’e, Koordenadór Eskola São Francisco de Assis, João de Araújo Moniz agradese ba Xefe Governu ne’ebé hakat ona to’o sira-nia fatin hodi haree no rona rasik preokupasaun ne’ebé sira hasoru.

“Avó Xanana mosu mai derepente hanesan ne’e supreza boot ba ita povu no estudante sira ne’ebé susar ba buat hotu-hotu. Ami na’in lima ho diploma Sekundáriu ho fuan ne’ebé hakarak atu dezenvolve rai ida ne’e liu-liu prepara no eduka oan sira sai matenek,” dehan João.

Entretantu, estudante iha eskola ne’e hamutuk na’in 102, kompostu husi feto na’in 54 no mane na’in 48.

Estudante  sira ne’e maioria hela ho distánsia dook, la’o de’it husi ai-laran no hakur mota hodi ba to’o iha eskola.

Editór: Jorgino dos Santos