Udan boot mós rezulta estrada no valeta balun intupidu, tanba nakonu ho foer oin-oin ne’ebé soe arbiru iha mota laran, valeta no estada públiku.
Alende ida ne’e, edifisiu instituisaun públiku sira, loja no kioskiik ne’ebé lokaliza iha área Caicoli, Audian, Bairru-Pitté, Comoro bee nalihun nakonu ho tahun naruk.
Haree ba situasaun ida ne’e, Primeiru-Ministru, Kay Rala Xanana Gusmão kontaktu direita Ministru Obras Públika (MOP), Samuel Marçal, hodi lidera ekipa tun direita ho ekipamentu pezadu hodi normaliza hikas fatin risku ba dezastre sira iha Balide Raihun, Caicoli hodi suru sai raihenek no tahu ne’ebé nakonu iha estrada laran inklui hadi’a hikas mota dalan atu bee labele sobu uma komunidade nian.
Xefe Governu orienta mós ba liña Ministériu ne’ebé servisu iha área sosiál nian atu salva povu hosi risku dezastre no apoia vitima hirak ne’ebé uma no sasán hetan estragus.
Durante iha terenu, Ministru Obras Públika, Samuel Marçal hamutuk ho ekipa IGE-ADI ne’ebé hetan apoia hosi Kompaña Dili United hala’o mós normalizasaun ba bee dalan iha área Rebal hodi asegura komunidade uma kain -20 labele sofre ba unundasaun no suru sai mós foer no tahu ten ne’ebé intupidu iha valeta Eskola Sekundariu 04 de Setembru Balidi.
Hafoin suru sai rai no tahu nurak iha estrada laran, Ekipa Bombeiros KaiKoli Dili ho karreta fase mos kedas tahu ten iha estrada públiku ne’e.
Ekipa MOP no IGE-ADI koloka mós ekipamentu pejadu hodi halo normalizasaun ba estrada iha área Kristu Rei Dili, Becora, halo indentifikasaun iha área risku ba indundasaun sei hamos hotu kedas.
Iha sorin seluk, Sekretáriu Estadu Protesaun Sivil hasai kedas vitima inundasaun iha kapitál Dili mak hanesan, Becora, Bekusse, Caicoli, Fatuhada no fatin seluk hodi ba hela provizoriamente iha salaun Autoridade Protesaun Sivil.