Vítima hirak ne’e kompostu husi labarik idade 0-16 hamutuk na’in 76, inan ne’ebé sei fó susu bebé na’in sanolu resin tolu 13, inan isin rua na’in neen no (6) ema ho defisiensia na’in rua (2).
Tanba relasiona ho udan boot ne’ebé akontese iha loron sia fulan-Janeiro tinan 2024, durante oras haat nia laran hahú husi 14h00 to’o 18h00 hodi rezulta bee tama hotu ba komunidade sira nia uma no estraga mós sasan balun.
Prezidente Autoriedade Protesaun Sivil, Superintendenti Polísia Ismael da Costa Babo hatete, udan ne’ebé akontese ho intensidade forte iha teritóriu laran tomak, inklui Munisípiu Dili kuaze bee nakonu iha Estrada laran no tama mós ba komunidade sira-nia uma.
“Akontesimentu okorensia dezastre naturál mak akontese horiseik, udan durante oras haat nia laran komesa tuku rua to’o tuka haat, ne’ebé mak afeita iha kapitál Díli, no udan ne’e mós ba teritóriu nasionál tomak, nune’e iha minisípiu sei kontrolado maibé iha situasaun balun mak presiza toma atensaun” dehan Prezidente APS iha sala konferensia APS Kaikoli. Kuarta (10/01).
Prezidente haktuir liliu iha Munisípiu Dili iha área sira ne’ebé tinan-tinan identifika sai hanesan risku ba inundasaun mak mak Kaikoli Kolmera, Komoro-Golgota, Bekussi, Balide Aimutin Fatu-Hada, Bekusi Tasitolu Kuarentina Bairo-Pite No Surikmas.
Entertantu, Konaba dadus uma kain hira mak afeita ba inundasaun ekipa husi autoriedade protesaun sivil seidauk iha tanba sei halo asesimentu fila-fali.
No vítima sira ne’ebé APS evakua ba Salaun APS fó kedas apoiu emerjénsia, nune’e mós koordena ho Ministeriu Saúde (MS) liu husi sentru saude fó mós asisténsia médiku ba vítima sira.
“vítima sira fó ona apoiu emerjénsia no kontinua halo assesmentu ba dadus, nune’e mós kordena ona ho MS liu husi sentru saúde fó ona asisténsia médiku ba família afetadu ne’ebé evakua mai salan APS,” dehan Prezidenta APS.
Enkuantu, husi munisípiu sira ekipa APS relata dadus iha Munispiu Ermera afeita ba uma rua, Kovalima uma ida, Manatuto Ai-monu hodi estraga komunidade nia uma ida, Manufahi afeita ba uma ida, Lautem, Likisa no RAEOA ai monu hodi taka dalan maibé ekipa APS halo ona intervensaun.
