“Osan ho valor $600,000 apoiu husi Ministériu Saúde sei permite PAM hodi sosa stock liu 380 métriku toneladas iha tinan 2024.”  Hateten Minitstra Saúde Elia Amaral  ne’ebé asesu husi komunikadu Kuarta,(08/01).

Nia dehan, produtu hirak ne’e sei distribui husi Ministériu Saúde atu responde no jere problema malnutrisaun agudu, króniku no sei fó benefísiu ba inan isin-rua no inan fo-susu sira ne’ebé liu 10,000 iha munisípiu 13 ne’ebé hasoru hela lakuna ai-han nutritivu.

“Ho fornesimentu ai-han nutritivu liu husi Sentru Saúde Komunitária, Governu Timor-Leste sei hasa’e nutrisaun ba inan isin-rua no inan fo-susu Sira.” Dehan nia.

Nia afirma, inisiativu ida ne’e reprezenta pasu ida ba oin ba estratejia Timor-Leste nian hodi kombate ra’es badak no alkansa objetivu halakon hamlaha iha tinan 2030.

“Feto ho labarik feto sira ho idade reprodutiva hasoru problema boot ho lakuna ai-han nutritivu iha rai laran.” Afirma nia.

 Ida ne’e aumenta mós ho impaktu husi Covid-19, kustu ai-han ne’ebé aas no mudansa klimátika derepenti, ne’ebe tau feto iha risku aas ba malnutrisaun.

Reprezentante Programa Alimentar Mundial iha Timor-Leste Alba Cecilia Garzon Olivares hatete, sente haksolok hodi asina parseirú ho Ministeiru saúde Timor-Leste.

“PAM haksolok ho parseria ho Ministériu Saúde atu ajuda hatan ba lakuna ne’e no apoiu futuru ida saudavél liu ba inan no labarik sira iha Timor-Leste" afirma nia.