Konsellu Ministru hala’o sorumutuk hodi aprova ona projetu Rezolusaun Governu ne'e aprezenta husi Primeiru Ministru Kay Rala Xanana Gusmao nomeia sidadaun na'in tolu José Telo Soares Cristovão, Maria Domingas Alves hanesan Komisariu KFP no Agostinho Letêncio de Deus hanesan prezidente.
"Konsellu Ministru aprova ona projetu Rezolusaun Governu, ne'ebé aprezenta husi Primeiru-Ministru, hodi nomeia José Telo Soares Cristovão, Maria Domingas Alves no Agostinho Letêncio de Deus, atu ezerse mandatu ida ba tinan lima, ho rejime dedikasaun eskluzivu, nu’udar Komisáriu Funsaun Públika," dehan Komunikadu ne'ebé diariu ne’e asesu, horisehik.
Konsellu Ministrus mós deside hodi indika Agostinho Letêncio de Deus m maka sai nu’udar Prezidente Komisaun Funsaun Públika hodi asume mandatu bá tinan lima.
Antes loron hirak bá Governu hasai ona despasu ida, hodi ezonera Prezidente Komisaun Funsaun Publika (KFP) ho komisariu na'in rua, governu konstituisional da sia liu husi despaiu numeru 12/PM/11/2023 Ezonera Prezidente Komisaun Funsaun Publika (KFP) Faustino Cardoso Gomes, ho komisariu na'in rua mak hanesan komisaria Maria de Jesus Sarmento no Komisaria Carmeneza dos Santos Monteiro.
Tanba governu da sia ne'ebé lideradu husi Primeiru Ministru Kay Rala Xanana Gusmao, konsidera komisariu sira ne'e laiha kapasidade adekuada hodi kumpre sira nia orientasaun hodi alkansa metas.
Membru sira ne'e nomeia liu husi rezolusaun governu numeru 14/2020, no komisaria sira ne'e nia mandatu sei remata tinan 2025.
