Hospital Nasionál Guido Valadares (HNGV) ne’ebé sai nu’udar ospital boot liu iha Timor-Leste de’it sei hasoru problema aimoruk.

Diretor Klínika HNGV, Marcelino Correia hatete, HNGV sei kontinua hasoru problema aimoruk.

Nia parte, dehan, haruka ona pedidu ba Institutu Nasionál Farmasia no Produtu Médiku (INFPM) maibé to'o agora seidauk iha resposta.

“Ida ne'e realidade akontese iha HNGV kona-ba stock aimoruk, ida ne'e ita nafatin enfrenta (menus) ba aimoruk hodi responde ba iha pasiente sira, tanba ne'e ita nafatin koordena ho INFPM, atu nune'e oinsa mak bele responde ba preokupasaun sira ne'e," dehan Marcelino iha HNGV, Kuarta (15/11).

Tanba problema stock aimoruk ne’e, nia dehan, mediku sira tenke pasa reseita ba pasiente sira atu sira bele ba sosa aimoruk iha klínika privadu sira nune’e labele fó impaktu ba sira-nia saúde.

Molok ne’e, Diretóra Servisu Apoiu Diagnostiku no Terapeutiku (SADT), HNGV, Mingota da Costa Herculano informa, aimoruk ne’ebé stock out iha HNGV hamutuk item 121 ba kategoria vital, esensial no kritikal.

“Totál aimoruk esensilista iha HNGV hamutuk 405 item, husi númeru ne'e 121 item mak stock out no 284 mak stock iha, maibé ida ne'e la sufisiente atu responde ba ita-nia pasiente sira, tanba ita hatene katak ospital nasional la'ós simu de'it pasiente sira iha Dili, maibé ita mós fó atendimentu ba pasiente sira iha territóriu nasionál ne'ebé mak halo transferensia husi sentru saúde no postu saúde sira iha munisipiu hotu," dehan nia iha HNGV, Tersa (07/10).