Programa 7, mak hanesan Eskola ba Uma, Bolsa estudu ba estudante sira, koneksaun rede internete ba eskola, distribuisaun livru apoiu aprendijazen, distribuisaun kaderneta, estudu viabilidade no destribuisaun kadeira no meza.
"Ha'u lori MEJD nia naran agradese ba Primeiru Ministru ne'ebe ho desponibilidade tomak hodi lansa programa 7 ne'ebe mai husi MEJD,"dehan Ministru Edukasaun Juventude no Desportu Armindo Maia, iha ambitu seremonia lansamentu, iha EBC 30 Agostus, Komoro, kinta (04/08).
Nia dehan, programa Eskola Ba Uma hala’o ona iha fulan-Agostu tinan ne’e iha Munisipiu Dili.
Programa hanesan, Eskola Ba Uma, Koneksaun Internet ba Eskola, Bolsu Estudu ba Estudante sira, ne’e kobre husi Orsamentu Jeral Estadu (OJE) 2022, inklui ho orsamentu retifikativu.
OJE 2021 mak, MEJD sosa kadeira no meza hamutuk 20.000 hodi distribui ba eskola sira kompostu husi Pre-Eskolar no ensino sekundaria jeral.
Ministru mos la esplika detaillu orsamentu espesifiku ne’ebe aloka ba programa hirak ne’e.
Nia Informa, programa sira ne'e hanesan komprimisu VIII governu nian, hodi reforsa programa edukasaun no formasaun ne'ebe mak tutela husi MEJD, programa eskola ba uma sei inisia ho modalidade ensinu familia no servisu ensinu biblioteka movel.
Iha fatin hanesan, Primeiru Ministru (PM) Taur Matan-Ruak espera lansamentu ohin bele kontribui ba kna'ar professor sira bele kontribusi ba estudante hodi konkista nia fatin no futuru iha tempu.
"Liu husi lansamentu ne'e ema hotu sai sasin katak governu sei prepara di’ak liu tan kondisaun ba estudante sira hodi bele aprende di'ak liu tan, tanba ema mak sai sentru ba dezenvolvimentu maibe ita mos tenke tau matan ba oan sira nia saude hodi sira moris naruk," dehan nia.
