"Projetu ne’e hakarak atu introdús iha Lei Eleitorál ba Parlamentu Nasionál inovasaun sira ne’ebé introdús ona iha tinan 2011 iha Lei Eleitorál ba Prezidente Repúblika, hodi mantein armonizasaun regra sira kona-ba prosesu eleitorál iha órgaun soberanu ne’e," dehan Ministru Prezidénsial Konsellu Ministru, Fidelis Leite Magalhães, iha Palasiu Governu Kuarta ne'e (03/08).

Governante ne'e hatutan, inklui mós iha Lei Eleitorál ba Parlamentu Nasionál regra foun sira kona-ba oráriu funsionamentu sentru votasaun, lisensa ba jornalista, iha servisu kobertura jornalístika eleisaun parlamentár nian.

"Eleitor sira vota iha sentru votasaun ne’ebé besik liu iha sira-nia servisu fatin, obrigatoriedade eleitór sira hodi identifika sira-nia an bazeia ba dokumentus identifikasaun pesoál ne’ebé valídu, ka kriasaun figura monitór eleitorál ne’ebé ninia funsaun hanesan ho observadór eleitorál sira", nia esplika.

Nia akresenta, norma balun mós hadi’a, hodi klarifika katak iha asembleia apuramentu nasionál CNE deside ho definitivamente kona-ba votu nulu sira, no elementu sira ne’ebé tau iha boletin votu inklui inkluzaun númeru orden husi kada kandidatura rezultadu husi sorteiu lista kandidatura sira.

"Ikus liu, adota inovasaun prinsipál ida husi eleisaun prezidensiál tinan 2021, mak hanesan, sentru votasaun paralelu sira, maske ho forma foun. Nune’e, prevee atu instala sentru votasaun paralelu sanulu resin tolu, iha Díli, ida-idak asosia ba Munisípiu ida no ba RAEOA," nia dehan.

Nia fundamenta, sidadaun eleitór saída de’it ne’ebé inskreve ona iha unidade resenseamento fora husi Dili, no sira ne’ebé la hakarak atu ba vota iha ninia sentru votasaun orijinál rasik, bele inskreve iha sentru votasaun paralelu sira ne’e.

Entretantu, prosposta Governu apova ona nune'e sei haruka ba Parlamentu Nasional (PN).