Tuir komunikandu ne’ebé Online INDEPEDENTE asesu, Sorumutu Líder nain rua ne’e hanesan primeira vizita Estadu no Governu nian entre nasaun rua Timor-Leste no Repúblika Índia. Primeiru Ministru, Narendra Mondi reafirma ho komitmentu forte katak sei hametin liu tan relasaun Bilateral entre nasaun rua ne'e nian iha Futuru.
“Prezidente Horta hato'o nia agradesimentu ba Primeiru Ministru Mondi nia Konvite hodi bele partisipa iha Simeira ida ne'e. Atu bele alkansa nia prioridade sira, Xefe estadu husu mos Governu Índia nia apoiu, atu bele tulun Timor-Leste, liu-liu iha área Saúde no reforsa kapasitasaun IT,” dehan komunikandu ne’ebé Online INDEPEDENTE sita iha kinta-feira (11/01).
Haktuir katak, Primeiru Ministru Índia Shri Narendra Mondi komprimitidu katak, sei tulun Timor-Leste iha area dezenvolvimentu, kapasitasaun umana, Tekonolojia IT, saúde inklui fornese ai-moruk tradisionál no farmaseutíka.
Tan ne’e, Prezidente Repúblika hateten sei apoia maka’as ba Índia nia misaun permanente iha membru Konsellu Seguransa ONU nian. Lider na’in rua ne’e komprete katak sei serbisu hamutuk liu tan iha area multilateral.
Xefe Governu Mondi fó mos apresiasaun ba Timor-Leste nia partisipasaun ativu iha edisaun daruak Simeira Voz Sul Globál nian (Voice of Global South Summit). Sira konkorda hamutuk katak nasaun hotu-hotu ne’ebé hamahan-an iha “Global South Summit” ne’e, tenke reforsa sira pozisaun iha kestaun Globál nian.
Primeiru Ministru Mondi mos Felisita Prezidente Horta kona-ba desizaun Prinsipiu ASEAN nian hodi rekoñese Timor-Leste nu’udar membru ba dala 11 no nia espera katak Timor-Leste nia adezaun ne’e, bele alkansa iha tempu badak.
Relasaun Bilaterál Timor-Leste no Índia ho valor demokrásia sira no pluralidade ne’ebé hanesan. India mak nasaun primeiru ne’ebé estabelese relasaun diplomátika desde tinan 2003.