Diretora Eskola Bázika Sentrál (EBC), Filomena Fátima Belo Freitas hatete, eskola pronto atu kontribui ba sirkulár husi Ministériu Edukasaun hodi devolve orsamentu ne’ebé inan aman antes ne’e kontribui ba eskola.
“ohin asuntu importante mak ne’e, atu devolve fali orsamentu ida ne’ebé mak inan aman sira fó, iha hau nia eskola ha’u la foti buat barak ida, hau foti $2.00 ba administrasaun bazeia ba e $12. 00 ne’e Asosiasaun Pais no Professores sira halo akordu,” dehan nia ba jornalista sira iha EBC Faról Kinta (11/01)
Nia hatutan, antes inan aman sira kontribui osan $14.00 profesór no inan aman husi estudante iha reuniaun ida hodi deside prontu kontribui ba eskola hodi hadia fasilidades sira hodi fó benefisiu ba estudante, no liuhusi kontribuisaun ne’e, atu ajuda edukasaun atu ensinu aprendisajen la’o diak
Maibé ikus mai sirkulár ne’ebé fó sai husi Ministériu Edukasaun (ME) ho nu. 262/XII/SE-ESG-ESTV/2023 katak bandu atu eskola públiku halo kobransa ba inan aman sira.
Tanba ne’e, profesór sira kumpri orden husi sirkulár husi Ministeriu Edukasaun (ME) atu devolve osan sira ne’e.
“ami iha kraik ami la halo buat barak ami tenke rona órden husi nasionál ho munisipál, osan agoura tenke ser fó fali” hatete nia.
Iha fatin hanesan, Diretor Servisu Edukasaun Municipiu Dili Carlito da Silva hatete, objetivu atu devolve fali osan bazeia ba sirkulár ne’ebé Ministériu Edukasaun hatun mai iha munisípiu hotu-hotu, katak fo orientasaun ba eskola sira, atu devolve fila fali osan tanba bandu iha sirkular.
Nia dehan, eskola hotu-hotu sei devolve hotu, iha dia 15 agora ensinu sekundaria jeral 12 novembru bekora, sira seluk sei haree iha kalendariu inspitór sira sei tun atu ba haree diretamente.
“Ba haree devolve osan, sira sei ba haree mós saída mak sira infrenta iha eskola refere atu kontinua alista hodi buka hatene hukum lolos nee oinsá, kada vez ita bele brani buka problema sira hanesan ne’e hodi ita resolve problema ne’e ba oin.”
Montante osan ne’ebé inan aman kontribui ba eskola EBC hamutuk rihun rua-nulu (20.000) ne’ebé iha komisaun organizadora rekolla, kada estudante kontribui $14.00 maibé foin metade de’it.