"Ita hare servisu bo'ot ida ne'ebé parte IGE halo hodi responde situasaun emerjensia sira, liu-liu iha dezastre naturais, ne’ebé sidadaun no emprezariu sira presiza no mós populasaun sira tomak ne’ebé bee tama sira nia fatin,”dehan nia iha serimonia entrega ekipamentu pezadu, iha edifisiu IGE,IP, Kolmera, segunda ne’e (29/08).
Tuir Xefe Governu, bainhira iha situasaun emerjensia ruma no dezastre naturais la'os de'it servisu IGE.IP mesak, maibé hetan mós apoiu husi emprezariu balun ne’ebé halo kontratu ho Governu hodi oferese sentidu umanismu ba sidadaun sira.
"Ha'u Kontente los tinan hirak ne'e nia laran ekipamentu pezadu halo servisu barak los, pauza masimu rekursu ne'ebé ita iha hodi apoiu ita nia populasaun, ha'u ladun preokupa atu ekipamentu pezadu halo osan ba Governu, mais ha'u preokupa oinsa ajuda ita nia populasaun, loke dalan ba sira, ne'e ha'u kontente los," PM apresia.
Tanba ne'e, PM espera katak, ba futuru IGE.IP sei kontinua nafatin fó apoiu ba populasaun sira ne'ebé hasoru situasaun dezastre naturais no kalamidade ruma.
iha Fatin hanesan, Prezidente Institutu Gestaun Ekipamentu (IGE.IP) Ermenegilda da C. Laurentina, rekoñe durante kalamidade ne’ebé akontese udan boot, difikulta tebes ba IGE atu mobiliza makina pezadus ba fatin sira akontesimentu ne’e.
“Iha Dili laran, parte Manleuna nian katak uma sira ne'e besik malu entaun ita atu mobiliza makina pezadus ne'e difisil, maibé sira nafatin tenta dehan IGE tenki mai. Ami ba to'o iha fatin, makina pezadus labele tama atu apoiu ita nia komunidade sira,”dehan nia.
