Xefe Governu dehan, ekipamentu ne’e introduz ona tinan haat nulu ba kotuk, maibé Timor-Leste foin ba dahuluk hetan, atu nune’e, hodi halo konsultasaun ba pasiente ne’ebé hetan moras rins, atu bele minimiza lori pasiente ba rai liur.
“Ohin (horseik), ita halo inagurasaun no lansamentu ba ekipamentu ne’ebé ita iha no ekipamentu ne’e introduz ba 40 anós ba kotuk, Timor-Leste foin primeira vez mak hetan, ainda proxima oferta husi ita-nia parseiru dezenvolvimentu Repúblika Popular Xina, ha’u hakarak ,iha okaziaun ne’e lori Governu nia naran, Ministériu Saúde, Senór Diretór no familia boot Hospitál Nasionál Guido Voladares (HNGV) agradese ba Embaixadór Popular Xina,”dehan PM Taur, iha Komunikadu ne’ebé Online INDEPENDENTE asesu, kinta ne’e (29/09).
PM hatutan, aliened, apoiu ekipamentus liptotripcia ne’e, Governu Xina mós apoiu ona Timor-Leste iha ambitu dezastre naturais, no mós iha situasaun Covid-19.
Tuir Xefe Governu, Embaixadór Xina dehan, makina ida ne’e bele ajuda problema ne’ebé Hospitál Nasionál Guido Valadares enfrenta hodi minimiza pasiente ba liur no mós fó servisu ba mediku sira atualiza sira nia pratika iha servisu lorloron nian,
“Tanba buat ida ita aprende iha banku eskola sira nian ne’e seluk iha, ita testa iha pratika lorloro nian, entaun ne’e lorloron mediku sira tau iha pratika buat ne’ebé sira hatene, sira aprende hodi asiste pasiente sira. Ha’u aproveita saúda medika xineza ne’ebé parseria ho mediku sira husi Hospitál Nasionál Guido Valadares bele halo preparativus hotu ohin ita bele reuni iha ne’e hodi testamunha ba akontesimentu ida,” dehan Xefe Governu.
Taur realsa, Governu dadaun komprometidu hadia Hospitál Nasionál Guido Valadares iha aréa infraestrutura tanba durante ne’e akontese problema ruma susar atu jere ho di’ak.
“Governu kompremetidu apoiu buat ne’ebé bele ba hadia ita nia Hospitál Nasionál Guido Valadares, tuir ha’u nia hanoin primeiru prioridade mak infraestruturas, dalaruma ita hare nesesidades obriga ita aumenta bolsu kikoan kikoan iha fatin ida ne’e, to’o momentu ida ita laiha kbi’it aju jeré buat kikoan barak demais, i ha’u orgulhu Ministra Saúde no ekipa téknika Ministériu nian halo esforsu barak para serbisu hamutuk ho Ministériu Finansas buka rekursus finanseirus para dezenvolve óspitál sira, primeira vez ita boot sira konklui master plan ba Óspitál Nasionál Guido Valadares no Hospitál Lahane no investimentu ne’ebé sei boot maibé laiha buat ida ita hetan de grasa,” PM akresenta.
Entretantu, Xefe Governu dehan, Timor-Leste tau prioridade liu ba ema nia saúde tanba dadaun seidauk iha óspitál ida kualifikadu maibé espera iha tempu badak sei iha investimentu ba aréa saúde nian.
Enkuantu, PM husu ba Mediku sira iha HNGV atu uza didiak ekipamentu sira hodi salva ema no pasiente sira ne’ebé presiza.
