“Iha 16 novembru sei lansa subsídiu $200 fim do ano ba uma-kain sira, ita halo fulan klaran, nune’e iha fulan-dezembru bele remata, tanba buat ne’e liga ho dadus entaun presiza lansa sedu,” dehan nia ba jornalista sira, hafoin remata reuniaun Konsellu Ministru, iha Palásiu Governu, Dili, kuarta horseik (28/09).

Ministra hatutan, pagamentu ne’e hala’o sedu, atu nune’e bainhira iha reklamasaun, bele resolve kedas kestaun hirak ne’e.

Tanba dadaun ne’e, dadus ne’ebé Ministériu Adminitrasaun Estatál (MAE) submete ba MSSI hamutuk 39.110 uma-kain.

 “Ita simu dadus uma-kain husi MAE hamutuk 39.110 ho nia osan ne’ebé prevee millaun $700. Subsídiu ne’e universalmente katak uma kain hotu-hotu iha territóriu nasionál sei hetan subsídiu ne’e,” nia relata.

Enkuantu, Governante ne’e esplika, iha dekretu-lei 37/2022, 25 maiu, artigu ida (1), aliña 2, hatete, subsidiu fim do ano ne’e, sei fó ba uma-kain ne’ebé vulneravel liu iha Timor-Leste.

Aleinde, iha artigu rua (2) ne’e haktuir, benefisiáriu ba subsídiu anuál ne’e ba uma kain sira-ne’ebé rejistu ona iha “Livru Rejistu Uma-Kain” iha suku sira iha territóriu nasionál ne’ebé previstu ona iha Diploma Ministeriál Númeru 49/2017, 23 agostu.

Entretantu, Koordenadór Jerál Unidade Kooperasaun Parseria iha MSSI, João Coimbra, hatete, preparasaun subsidiu $200 fim do ano besik atinje ona 75%.

"Teknikamente, preparativu ba subsidiu $200 ne'e besik atinje ona 75%, hein deit kompleta tan dadus husi Ministeria Adminitarasaun Estatal (MAE), tanba parte tekniku ho estatal konsolida hela dadus iha suku iha teritoriu nasional," nia dehan.

Nia haktuir, uma-kain ne'ebé iha direitu mak sira ne'ebé rejistu iha 28 Fevereiru 2022 ba kotuk, maibé husi fulan-Marsu mai oin, sei laiha direitu, tanba bazeia ba dekretu lei.