Kestaun ida ne’e hato’o husi reprezentante povu husi bankada CNRT, Leandro Lobato, relasiona ho servisu Bee Timor-Leste, Empreza Públiku (BTL,EP).

"Oras ne'e daudaun povu Likisa hola de'it bee-moos, lorloron hotu-hotu tenke hola bee-moos. Enkuantu seidauk kria BTL,EP ne'e ema sira ne'ebé halo jestaun bee-moos, populasaun la kestiona depois governu muda ba Empreza Públiku, ohin loron ne'e kontrariu, la hatene, funsionáriu sira ne'e manán osan par depois husik hela nia povu,  sira la kumpre sira-nia obrigasaun,” dehan Leandro iha Parlamentu Nasionál (PN), Tersa (27/09).

Ho ida ne’e, deputadu CNRT ne’e mós kestiona kona-ba salariu boot ne’ebé jerente BTL,EP simu.

"Tanba ita rona de'it sira-nia saláriu ne'e, Prezidente BTL,EP ne'e, liu Prezidente Repúblika, nia no funsionáriu sira ne'e mós fulan-fulan simu osan boot, maibé sira-nia antendimentu, fornesimentu bee ba komunidade ne'e sai fali problema," dehan nia.

Tanba ne'e, nia husu BTL,EP atu buka solusiona problema bee-moos.

Iha fatin hanesan, Deputadu Bankada Fretilin, Fabião de Oliveira hatene, daudauk ne’e populasaun iha suku Komoro defisil tebes atu asesu bee-moos.

Nia dehan, molok ne’e Ministru Obras Públika sesante, Salvador Pires deklara forma task force atu halo jestaun bee ne'ebé sirkula iha Dili laran, maibé realidade task force sira la la'o atu kontrola.

"Tanba ne'e husu governu, liu-liu BTL, atu haree asuntu ida ne'e tuir osan ne'ebé mak aloka ba sira, atu sira bele iha responsabilidade atu haree ho task force sira ne'e hodi kontrola bee sira iha Dili laran," katak nia.

Ba kestaun ne’e, Ministru Asuntus Parlamentares no Komunikasaun Sosiál (MAPKomS), Francisco Martins da Costa Pereira Jerónimo hatete, Konsellu Ministru halo ona diskusaun kona-ba saláriu ba Institutu Públiku no Empreza Públiku.

"Atu aprova dekretu lei ida atu regulariza sira, atu sira (nia salaraiu) labele aas liu Prezidente Repúblika nian," dehan nia.