Provedoria Direitus Umanus no Justisa, Jesuina Maria Ferreira Gomes, hateten, objetivu husi akordu ne’e mak ba dahuluk atu haforsa kooperasaun institusional no esforsu koletivu hodi promove no proteje direitus umanus, prevene prátika krime iha administrasaun públika no iha ezersisiu funsaun públika no mal administrasaun.

Nia dehan, importansia daruak mak atu hasa’e kapasidade instituisaun no pesoal sira liu husi atividade treinamentu, seminar, workshop, diseminasaun no mós atividade seluk ne’ebé mak iha aspetu ka natureza hasa’e no aumenta kuiñesimentu membru F-FDTL iha area Direitus Umanus no Governasaun Di’ak.

Aliende, importansia datoluk mak atu fortalese kooperasaun iha prosesu investigasaun violasaun direitus umanus no governasaun di’ak ne’ebé PDHJ hala’o.

Tan ne’e, Xefe Estadu Maior Jeneral F-FDTL sei apoiu no kolabora hodi autoriza membru F-FDTL sira marka prezensa iha PDHJ tuir konvokatóriu ne’ebé PDHJ haruka.

Karik iha imposibilidade atu marka prezensa tenke fó justifikasaun kona-ba imposibildade marka prezensa tuir oras no data ne’ebé determina.

Nia hatutan, iha tinan 2016, PDHJ, Komando F-FDTL ho Ministro Defeza Asina Termus Referensia (ToR) ho objetivu espesifiku tolu mak hanesan, dezenvolve manual treinamentu kona-bá Knaar F-FDTL no Direitus Umanus ne’ebé utiliza ona ba formasaun ba membru F-FDTL hahu iha tinan 2018.

Prepara treinador husi membru F-FDTL, ne’ebé mai husi treinador na’in 7 kompostu husi Major na’in 2, Tenente na’in 4 no Sarjentu na’in 1.

Aleinde, organiza treinamentu regular ba membru F-FDTL iha Timor-Leste, implementa ona hahú tinan 2018 to’o agora.

“Ohin kontinua koperasaun ne’ebé estabelese ona liu husi ToR iha forma akordu koperasaun entre PDHJ no F-FDTL. Iha ToR uluk foka deit ba área direitus umanus maibe iha akordu ida ne’e sei inklui mós governasaun di’ak,” dehan nia iha komunikadu ne’ebé Online INDEPENDENTE asesu, kuarta ne’e (24/11).

Nia haktuir, dezde tinan 2018 to’o agora, ekipa konjunta ne’ebé mai husi, PDHJ, Komando F-FDTL, Ministeriu Defeza no UADU konsege realiza ona formasaun hamutuk 15 ba membru F-FDTL husi komponente Terrestre dala 8, komponente Naval dala 4, Polisia Militar dala 2 no CAS dala 1.

Total formadu hamutuk 342 kompostu husi Mane 304 no Feto 38.

“Númeru feto menus tebes, ho nune’e enkoraja nafatin ba Tenente Jeneral atu promove nafatin feto iha treinamentu hirak tuir mai,”haktuir komunikadu refere.

Iha oportunidade ne’e, Provedoria mós hato’o agradesimentu ba Komando F-FDTL ba kooperasaun di’ak ne’ebé lao tiha ona, hodi hasa’e kuiñesimentu no kompresaun atu prátika iha servisu lor-loron no mós prepara forsa armada sai profisional no diak liu tan.

Aleinde, iha mós kuiñesementu klean kona-ba regras no normas internasional sira hodi respeita nafatin ba direitus umanus bainhira partisipa no kontribui ba misaun manutensaun paz ONU nian iha Mundu no mós hodi promove governasaun di’ak iha instituisaun F-FDTL.

Tanba ne’e, espera ho programa kapasitasaun direitus umanus no governasaun di’ak bele kontribui hodi alkansa Timor-Leste nia vizaun iha Planu Estratejiku ba Defeza no Seguransa Nasional.

Iha fatin hanesan, Xefe Estadu Maior Jeneral Forsa Armadas F-FDTL, Tenente Jeneral Domingos Raul ‘Falur Rate Laek’, mós haktuir katak, hafoin hetan formasaun lubuk ida husi PDHJ, Militar balun komesa hatudu ona sira nia matenek hodi respeita ba Direitus Umanus ne’ebé iha.

“Ezemplu, iha sidadaun balun ne’ebé ema baku maibé sira la hasoru, fó deit sira nia aan ba ema baku, entaun ida ne’e hatudu katak, Militar sira mós iha ona kuiñesementu ne’ebé klean, tanba, iha ne’ebé Militar ida kaer tiha Kilat ema baku nia se an deit ba,”dehan Falur.

Tan ne’e, hein katak ho akordu ida ne’e sai liña orientasaun ba dezenvolvimentu institusionais iha nasaun independente ida ne’e.