Deputadu Bankada PD, Mariano Assanami Sabino hateten, Parlamentu Nasionál aprova ona OJE 2022, ne’e duni presize konsistensia atu aselera dezenvolvimentu, tanba tinan hirak ba kotuk orsamentu lubuk ida maka aloka ba dezenvolvimentu infraestrutura, maibé kuaze la hala’o.
“Tinan-tinan sempre levanta kona ba problema estrada ba parte Baguia, Kelikai, Venilale no estrada sira iha parte fronteira nian, Lolotoe, Fatumean, Fatululik seidauk realiza,” dehan Mariano Assanami Sabino iha Parlamentu Nasionál, (10/01).
Nia haktuir, estrada ba parte Baguia no Kelikai nia orsamentu aloka kedas iha ukun governu anterior, maibé la halo no to’o ohin loron estrada sira sei at nafatin,” tenik nia.
Timor-Leste ukun an tinan 20 ona, maibé povu barak sei halerik nafatin beemos no estrada, tan ne’e governu tenke hare preokupasaun hirak ne’e.
“Ita muda ona politika hodi tau kompana estatal (Bee Timor-Leste) hodi tau ba beemos no iha ona estudu lubuk ida ba beemos, tan ne’e ita presiza aselera ona prosesu ne’e,” nia relata.
Nia argumenta, aliende estrada no beemos, iha aldeia barak maka seidauk asesu ba eletrisidade, maski kuaze 70% eletrisidade lakon ona iha territoriu nasionál, maibé restu seidauk hetan.
Entertantu, Deputadu Bankada KHUNTO, António Verdial de Sousa kongratula tékniku sira husi MOP ne’ebé sempre prontu hala’o servisu bainhira m0su dezastre naturais, hanesan rai halai, ponte no estrada kotu.
Iha biban ne’e, nia suzere ba MOP atu tau nafatin atensaun ba empreza Bee Timor-Leste no EDTL. Tanba, komunidade balun sempre hatoo lamentasaun kona ba ahi mate iha kada semana no fulan hodi estraga sira nia sasan.
“Husu ba Emprezariu Publiku Bee Timor-Leste atu tau atensaun ba Beemos, tanba iha Dili laran komunidade barak la hetan beemos to’o agora,” nia fó hanoin.
Nune’e mós, Deputada Bankada Fretilin, Gabriela Alves hateten, atu liberta povu maka governu tenke halo lalais dezenvolvimentu infraestrutura baziku sira, nune’e labele haterus povu ki’ik sira.
“Birograsia ne’e di’ak ba ita, maibé povu maka terus, kualkér governasaun ida la halo milagre iha dezenvolvimentu, bainhira laiha kooperasaun ho entidade sira seluk,” dehan nia.
