Prezidente Institutu Nasionál Kombate HIV/SIDA, Atanazio de Jesus, hatete, objetivu husi formasaun ne’e atu fasilita kadetes foun bombeirus sira atu halo prevensaun ba sira nia-an, relasiona ho moras HIV/SIDA, ne’ebé dadauk ne’e rejista as iha Timor-Leste, liu-liu iha Kapital Dili, Baukau, Bobonaro no Rejiaun Administrativu Oekuse Ambeno (RAEOA).
“Ita nia kadetes bombeiros sira, sira joven ne'ebé foun no foin mak involve-an iha kadetes bombeiros nian, ho ida ne’e presija duni atu fahe informasaun ba sira, relasiona ho moras HIV/SIDA, nune’e sira bele komprende no iha koñesementu hodi bele halo prevensaun ba sira nia-an,”dehan nia iha salaun Bombeirus, Kaikoli, Dili, tersa ne’e (11/01).
Tuir nia, kadetes bombeirus sira ne’e hanesan mós forum p3k, ne’ebé sira mak sempre ajuda ema dahuluk, bainhira sidadaun ruma hetan asidente, liu-liu asidente sira hanesan ahi han uma.
“Virus HIV/SIDA ne'e laos deit husi relasaun relasaun sexual, maibé bele mós ho ita nia ajuda sosial ne’ebé ita halo,”tenik nia.
Tanba ne’e, Institutu Kombate HIV/SIDA ohin loron dahuluk ba tinan 2022, hahú hala’o atividade ne’e iha Bombeiru, tanba iha ona kordenasaun ne’ebé diak entre lideransa masimu Bombeirus no Institutu Nasionál Kombate HIV/SIDA.
Nia akresenta, tuir planu, formasaun ne’e sei hala’o mós iha munisipiu to’o ba suku no aldeia sira iha area remontas. Nune’e, bele fahe informasaun ba komunidade sira atu halo prevensaun ba sira nia-an.
Iha fatin hanesan, Diretór Nasionál Bombeirus, Claudio Silva, hatete, hanesan servisu operasional interesante tebes ho formasaun ne’e, nune’e nia parte agradese ba oportunidade ne’ebé sira hetan.
“Tanba durante ne'e ita rona hela moras HIV/SIDA maibé ita fokus liu ba Covid-19, ha’u hanoin tempu to’o ona para ita atu tau atensaun ba moras sira ne'ebé afeta ou ameasa ba ita nia saúde, ho ida ne’e ami hanoin katak, iha bombeirus prejisa tebes informasaun sira hanesan ne’e ba ami nia membru sira,”dehan nia.
Nia akresenta, agora dadauk kadetes foun na’in 60 mak tuir hela formasaun durante fulan ida, tuir lolos formasaun ne’e hala’o fulan tolu, maibé failansu tekniku uituan, ho ida ne’e mak sira hala’o fulan ida deit, hafoin fulan rua nian sei mai tan.
Enkuantu, maske formasaun no sensibilizasaun husi parte relevante hotu hala’o ona, maibé moras nafatin rejista ho númeru aas.
Entretantu, tuir dadus husi Ministeriu Saúde ne’ebé rejista hahú iha tinan 2003 to’o setembru 2021, komulativu kazu konfirmadu hamutuk 1.464.
Husi númeru ne’e, na’in 234 mak lakon vida no na’in 719 hala’o hela tratamentu iha Sentru Saúde Vera Crus, Klinika Bairu-Pite, Óspital Referal lima no HNGV, aleinde restu ne’e ekipa sira sei halo dropout.
Asistente Editor: Saturnina da Costa
