Xefe Bankada PD, António da Conceição "Kalohan" hateten, razaun prinsipál ne'ebé lori governu atu altera lei ne'ebe inisialmente husi oitavu governu ninian, hola ona desizaun hodi konsidera Ataúru nu’udar munisípiu, maibè agora iha governu dasia hakarak atu halakon tiha filafali.

“Maibé ida ne'e halo ha’u konfuzu mak ne'e, Aileu bele dehan estatutu do Aileu administrativamente ne'e munisípiu, nomos naran ida Dili ne'e munisípiu. Agora Ataúro ne'e, buat ida rai kabouk ida ne'ebá ne'e, ninia administrativamente ne'e saida mak ida ne'e," dehan nia, iha PN, horisehik.

Maski razaun balun ne'ebe iha katak Ataúro seidauk iha kondisaun atu hamrik hanesan munisípiu ida, tanba dehan infraestrutura ne'e parte ida hodi bele mos ajuda Ataúro bele sai hanesan munisípiu.

Bainhira, ne'e Nia haktuir, see la difini loloos destinu Ataúro, entaun, iha Lospalos ne'ebe dehan Munisípiu Lautém, kompriende dehan illha jaco, entaun Ataúro ne'e saida? fatuk de'it mak iha ne'ebá ka saida?

"Ha'u hakarak hatene see nia (Ataúro) ne'e, E um ser ejistente ka lae, para depois ita bele ko'alia ninia estatutu,"afirma nia.

Hataan ba kestaun ne'e, Ministru Administrasaun Estatal (MAE) Tomas Cabral hatete, governu lori filafali kuarta alterasaun ba lei 11/2009, divizaun administrativa teritoriu ba PN, hodi bele halo alterasaun ba artigu balun.

"Ida mak sobre Ataúro tanba Atauro ne'e iha, alterasaun ba kotuk ne'e sei tama hela postu administrativu Dili," dehan nia.

Tanba ne'e, governu lori alterasaun ne'e mai, tanba iha artigu 4 husi lei refere, ne'e tama ona iha sirkutansia administrasaun ne'ebé mak iha.

Iha alterasaun Lei ne'e, nia dehan, sei hadi'a mos buat balun, liliu postu administrativu rua iha munisipiu Ermera, hanesan Hatulia A ho B, nomos munisípiu Lautém, sei akresenta iha lei divizaun administrativu teritoriu par bele asegura sira nia funsionamentu iha nivel munisipál sira.

"Iha Ataúro iha artigu 4 ohin ne'e abranza ilha de Ataúru ne'e, ho mantein nafatin kapital ka sidade ne'e iha Antiga vila, Maumeta,"hatete nia.

Dadaun, nia hatete, governu reajusta fali Atauru ne'ebe agora iha hela estatutu, depois aprovasaun ne'e bele avansa ba dekretu governu nomos fundu espesial ba Ataúru, ne'ebe iha governu anterior funsiona hela iha aktu sira ne'ebe liubá.

"Tanba ne'e mak ami lori fali mai ba PN atu husu aprovasaun, liliu mak munisipiu Ermera, Hatulia A ho B, Munisipiu Lautem, iha Lore, Luro ho Tutuala, iha munisipiu Dili, mak hasai tiha sirkustansia administrasaun Dili nian, iha lei Anterior seidauk revogadu ne'e, Atauro sei hola parte hela postu administrativu de Dili ne'e,"katak nia.