Diretór Klínika Bairo-Pité, Inacio do Santos hatete, Klínika Bairo-Pité fasilidade saúde kontinua menus fasilidade ne'ebe fokus ba moras Tuberkuloze, HIV/SIDA, no kuidadu Saúde Primaria liu-liu ba inan isin rua sira.
Nia dehan, tanba ne’e kuidadu Saúde Infantil ne'ebé sai nafatin problema ne'ebe Klínika Bairo-Píte hasoru no fasilidade sira -ne'ebe parseiru no governu fornese, la sufisiente.
“Maibé ida ne’e mak dezafiu ne’ebé mak durante ne’e sira infrenta, hanesan ita hotu hatene katak iha Klínika Bairo-Pité nafatin halerik bá fasilidade saúde sira, ne’ebé fó kuidadu bá ita-nia pasiente sira, liu-liu bá inan isin rua, tuberkuloze no seluk tan, nune’e bainhira kazu bo’ot ami la konsege halo operasaun tanbá ita nia fasilidade laiha, entaun ami transfere bá iha fasilidade sira seluk, liu-liu iha HNGV,” dehan Diretór Klínika Bairo-Pité, Inacio, iha CVTL, Bairo Farmoza, Tersa (10/10).
Nia dehan, iha kazu ne'ebé la konsege halo operasaun, entaun transferensia ba iha Ospitál sira, maske Klínika Bairo-Pité nu'udar organizasaun ne'ebé fó tratamentu ba Timor-oan sira.
Maibé difikuldade boot ne'ebé Klinika Bairo-Pité hasoru mak inan isin rua sira, hodi implika inan no oan mortalidade ne'ebe aas, tanba sira la iha fasilidade ne'ebé sufisiente hodi bele deteta kazu sira.
“Inan isin-rua, ne'ebé ba halo tratamentu iha Klinika Bairo-Pité, tenke transfere ba iha privadu sira hodi halo ultrasaun, tanba fasilidade saude la iha, tanba ne’e inan isin rua ne'ebe iha Osan bele ba no balun la iha osan tenke hein to’o partus, tanba sira la iha fasilidade saúde ni’an,” nia relata.
