Nia dehan, husi númeru ne’e, kompostu husi Ensinu báziku ho total hamutuk 29.100, Ensinu Sekundariu Jeral (ESJ) 23.256 no Ensinu Sekundáriu Tékniku Vokasionál (ESTV) hamutuk 4,142.

Sekretáriu Estadu mós husu ba estudante sira atu atu prepara-an ho di'ak bainhira tuir ezame nasional.

“Ezame Nasionál nudar parte integrante husi sistema edukativu Timor-Leste sei realiza hamutuk no simultaneamente ba estudante ensinu báziku klase sia (9) no Ensinu Sekundáriu terseiru klase,”dehan nia liu husi konferensia imprensa, iha Sala Konferensia ME Vila-Verdi, Kuarta (11/10).

Nia hatutan, husu ba inan-aman no manorin sira tenki kria ambiente ne'ebé konfortavél ba estudante sira atu estuda iha uma no mós presiza evita situasaun ruma ne'ebé bele perturba estudante sira nia preparasaun hasoru ezame Nasionál.

"Iha esperansa atu hetan rezultadu ne'ebé di'ak maibé iha mós preukupasaun balun, tan ne'e inan-aman sira mai ita kria ambiente tránkilu no konfortavél ba oan sira atu estuda iha uma," dehan Governante ne’e.

Entertantu, materia ba ezame nasional, sei distribui ba eskola sira iha munisipiu iha loron 13 fulan Outubru tinan ne’e no RAEOA distribui ona iha loron ohin (11/10).

Enkuantu, ba abertura ezame nasional, Sekretáriu Estadu akresenta, sei halo abertura iha RAEOA.