Kordenador Internamentu Vera Crus, Dr. Romel Braz, hatete, pasiente hirak ne’e transporta husi Óspital Nasional Guido Valadares na’in lima, Sentru Saúde Formoza II na’in lima, no restante maioria husi Sentru Saúde Komoro.

Husi númeru 23 ne’e, iha na’in 18 mai ho kondisaun kazu dengue, no restu iha kazu respiratoriu maioria ba labarik ho idade zero to’o lima.

“Total pasiente husi Sentru Saúde Formoza II ne’e iha na’in lima, ne’ebé lori direitamente mai iha ne’e, aumesmu tempo ita hahú istala iha tuku 7 kalan no kazu ne’ebé ita simu barak liu mai husi sentru saude komoro,”dehan nia iha knar fatin, Sentru Internamentu Vera Crus, kinta ne’e
(06/01).

Nia hatutan, ba kazu dengue na’in 18 ne’e kaman ho nia tipu moderadu hotu.

“Ita iha medikamentus sufisiente tanba atu atende ba ba kazu moderadu sira ne’e sufisiente hela, ekipametus mak ita hahú instala neneik, liu-liu ba laboratoriu, maibé atu responde ida ne’e laboratoriu, makina laboratoriu iha ne’e, ita tenta foin muda horkalan, atu fiksu didiak, nune’e sei halo teste ba esensial sira, liu-liu dengue, hodi asegura internamentu nia funsionamentu ne’e bele lao diak,”tenik nia.

Nia akresenta, ba rekursu sira ne’ebé iha Sentru Internamentu ne’e sufisiente no total pesoal saúde atu presta servisu iha estabelesemntu internamentu ne’e hamutuk na’in 22.

Entretantu, Sentru Saúde Vera Crus laos ona Izolamentu, maibé provizoriumente uza internamente ba kazu sira ne’ebé kaman. Laos deit hodi responde ba situasaun iha HNGV maibé ba mós sentru saúde sira iha Dili laran.

Nune’e, fatin ida ne’e sai hanesan sentru kapital ba munisipiu Dili, atu responde ba surtu ida agora makas ne’e liu-liu ba kazu dengue.