“Ho objetivu atu estabelese regra sira kona-ba ezekusaun Orsamentu Jerál Estadu tinan 2022 nian, hodi garante kontrolu orsamentu ida ne’ebé efetivu, rigorozu no kontrolu no simplifika prosedementu sira ezekusaun orsamentál nian,”dehan Ministru Prezidensia Konsellu Ministru, Fidelis Leite Magalhães, iha Palasiu Governu, kuarta ne’e (05/01).
Nune’e mós, atu fasilita ezekusaun Orsamentu Jetál Estadu husi órgaun no servisu sira setór públiku administrativu nian.
Iha Diploma ne’e mós, ho desizaun mantein maioria regras hanesan tinan rua anteriór no halo mós alterasaun regras balun ho forma adopta regras introdus iha Lei OJE 2022 ka lejislasaun sira relevante.
Entretantu, tuir komunikadu ne’ebé Online INDEPENDENTE asesu iha pajina Ministeriu Finansas hatete, iha loron 16 fulan-dezembru 2021, Parlamentu Nasionál aprova ona iha finál globál OJE 2022 ho montante totál $1.949.043.291 ho votu a-favor 44, kontra 21 no abstensaun 0. Aleinde, PN mós aprova orsamentu ba Seguransa Sosiál ho montante $299.285.500. Totál Despeza Globál $2.178.328.791.
Ho nune’e, OJE 2022 ne’e hetan ona promulgasaun husi Prezidente Repúblika iha loron 3 fulan-Janeiru 2022. Alokasaun OJE 2022 tuir klasifikasaun ekonómiku aas liu mak iha Transferénsia Públikas ho montante $715.071.939. Tuir kedan ho Bens no Servisus $466.877.382, Kapitál Dezenvolvimentu $390.177.399, Saláriu no Vensimentu $245.437.130 no Kapitál Menór $41.914.097.
Enkuantu, iha OJE 2022, Governu define ona ho loloos objetivu haat ne’ebé Governu hakarak alkansa iha tinan oin, 1) Atu kombate pandemia ne’ebé kauza husi Covid-19; 2) Atu proteje sidadaun sira; 3) Atu rekupera ekonomia no kria empregu; 4) Tinan 2022 haree hanesan tinan rekuperasaun ba pandemia Covid-19.
