Tuir Diretóra Servisu Saúde Munisipiu Dili, Agostinha Seguradu hatete, husi fulan rua ikus tinan 2021, kazu dengue sa’e makas.

Nune’e, tuir dadus husi SSMD hatudu kazu dengue hamutuk na’in 672, husi númeru ne’e maioria labarik ho idade tinan lima mai kraik.

“Ha’u hakarak klarifika ba labarik na’in 8 ne’ebé mate, na’in rua trasfere husi sentru saúde ne’ebé mai kedas ona ho sintomas labele halo atendimentu, entaun haruka liu ba ospitál nasionál, na’in neen sira seluk kuaze iha uma no derrepende de’it ba ospital maibé ita la konsege salva sira,” dehan nia hafoin partisipa lansamentu Vasina Booster, iha salaun Palasiu Sinzas, tersa horseik (04/01).

Nia hatutan, husi investigasaun ne’ebé ekipa saúde no médiku sira halo, hatudu, labarik hirak ne’e mate tanba familia atrazu demais lori ba iha ospitál.

“Dala-barak kazu ne’e afeta ba labarik tanba inan-aman ladun halo kontrolu maximu ba oan sira, nune’e oan sira hetan ona sinais isin-manas, ulun moras, maibé inan-aman sira hakmatek de’it, depois sintomas hakaas mak foin ba iha fasilidade,” nia dehan.

Tuir nia, moras dengue nu’udar moras ida ne’ebé kada tinan populasaun rai laran liu-liu labarik kiik sira sempre hasoru, ninia impaktu tanba ambitene no komunidade sira laiha konsidensia hodi soe foer iha nia fatin ne’ebé ikus mai hamoris susuk.

Tanba ne’e, nia husu ba familia hotu iha kapital Dili, atu hamoos ambiente iha tempu udan nune’e labele hakiak susuk ne’ebé ikus mai rezulta labarik sira sofre moras dengue no lakon vida.

Ba inisiu fulan Janeiru tinan 2022, nia informa, SSMD rejista kazu dengue haat (4). Kazu hirak ne’e mai husi postu Administrativu Dom Aleixo, Dili.