Tuir observasaun diariu INDEPENDENTE nota katak iha sentru votasaun Suku Bidau Lesidere, Kulu-hun, Bekora, Saburaka-Laran, Bairo-Pite no Balibar mak iha fiskais husi partidu hanesan FRETILIN, CNRT, PD, Frenti Mudansa no PLP.

Antes ne’e governu liu husi Sekretariadu Tekniku Administrasaun Eleitoral (STAE) fó sai katak kada partidu ida iha nia fiskais na’in lima iha sentru votasaun ida maibé realidade la hatudu partidu balun laiha  fiskais.

Alende ne’e partidu kiik sira seluk ne’e balun iha fiskais maibé la to’o na’in lima no balun laiha kedas maske antes ne’e STAE halo ona kordenasaun ho sekretariadu partidu politiku ida-idak atu bele aprejenta nia fiskais hodi observa iha sentru votasaun.

Antes ne’e Diretor Jeral Sekretariadu Teknika Administrasaun Eleitoral, Acelino Manuel Branco hatete, partidu politiku sira iha dever no obrigasaun moral atu priense kriterius ne’ebé fó sai ona atu nune’e kada partidu politiku sira bele destaka nia fiskais iha kada sentru votasaun hodi halo observasaun ba prosesu votasaun to’o kontajen votus hahú husi anivel sentru votasaun to’o munisipiu.

Nia hatutan, ba partidu politku sira ne’ebé la kumpri regras ne’e laiha lei ida atu kondena hodi kriminaliza sira maibé hanesan partidu politiku ida tenke hatudu nia responsabilidade iha prosesu eleisaun ne’e la’o.

“Laiha lei ida atu kriminaliza sira atu halo multa ruma maibé kuandu problema mosu iha sentru votasaun ne’ebé sira laiha fiskais ne’e sira laiha direitu atu halo reklamasaun tanba partidu ne’e nia fiskais la iha,”dehan Acelino hafoin fahe informasaun ba reprejentantes partidu politiku sira iha salaun STAE fulan rua liu ba.