Mudansa ba polítika hirak ne’e akontese hafoin estudante universitáriu sira halo asaun hodi kontra alienasaun ba karreta Prado Estadu nian ne’e.
Sekretáriu Jerál PN, Mateus Ximenes Belo hatete, tuir legalidade iha lei organizasaun funsionamentu administrasaun parlamentár, fo dalan ba deputadu sira atu tuir alienasaun ba patrimóniu Parlamentu Nasionál nian, maibé depende ba polítiku na’in sira mak bele deside.
Ne’e duni, nu’udar ajente Estadu nian ezekutiva de’it kualkér desizaun ne'ebé mai husi polítiku na'in sira.
“Ami hein ezekuta, tanba karreta hirak ne'ebé deputadu bankada partidu CNRT sira deside atu la partisipa iha alienasaun karreta ne’e, signifika sei fó fila osan $8.000 ne'ebé hatama ona ne’e”, tenik Mateus, iha servisu fatin, horisehik.
Nia hatutan, orsamentu manutensaun ba karreta Prado sira ne'ebé durante ne’e sira uza hodi halo servisu, balun mai husi Parlamentu Nasionál no balun deputadu sira rasik mak hasai osan mesak.
“Atu reembolsu kona-ba osan sira ne'ebé deputadu sira hasai hodi halo manutensaun ba karreta durante ne’e ha'u labele fó komentáriu”, dehan Sekjer PN.
Nia hatutan, prosesu alienasaun ne’e kuandu deputadu sira mandatu iha 31 Jullu, sira halo ona alienasaun hodi halo pagamentu. Tanba ne’e, surat sira ne’e sai ona ba privadu, xapa matríkula mós troka ba privadu. Ne’e duni, ohin loron deputadu sira uza xapa privada hodi kontinua servisu tanba sira nia mandatu estende.
Haree ba karreta sira ne'ebé ohin loron deputadu balun troka ona xapa matríkula ba privadu, ne’e tanba prosesu administrasaun remata ona iha 31 Jullu hodi halo leilaun, maibé desizaun ne'ebé bankada CNRT foti hodi lakohi halo alienasaun ne’e sei entrega ba parlamentu.
“Ha'u hanoin xapa matríkula ne’e la problema, maski sira troka ona ba privadu bele monta fila-fali”, dehan Mateus.
Nia hatutan, kuandu alienasaun ne’e iha fin-du mandatu mak dehan kansela, karreta sira ne’e sei fila-fali mai iha patrimóniu Parlamentu Nasionál, depois mak Konsellu Administrasaun halo fali jestaun.
Tuir Sekretáriu Jerál PN, prosesu ba sosa karreta foun ba Deputadu IV Lejizlatura ne’e depende ba kondisaun karreta atuál. Tanba ne’e, parte husi Konsellu Administrasaun sei halo fali estudu ida kle'an ba karreta tuan sira nia kondisaun.
Nia realsa, kuandu karreta atuál sira ne’e nia kondisaun la di’ak ona, maibé kontinua entrega ba deputadu foun sira uza ba servisu Parlamentu Nasionál nian, maka hakarak ka lakohi Estadu tenke hasai despeza ne'ebé boot ba manutensaun.
Nia hatutan, karreta Prado sira ne’e iha tinan 2012 kompañia Auto Timor mak manan konkursu hodi fornese. Tanba ne’e, Parlamentu Nasionál mós kontinua kontratu ho kompañia ne’e hodi halo manutensaun kada fulan ba karreta sira ne’e, maibé depende mós ba operasaun movimentu karreta nian barak liu loro-loron ba halo fiskalizasaun nia aparellu ruma aat tenke ba troka.
Durante iha tinan lima nia laran orsamentu hira mak gastu ba manutensaun karreta Prado 65 ne’e sekretaria jerál nia rasik la lembra. Relatóriu Parlamentu Nasionál nian iha maibé konfidensiál. Tanba ne’e, labele fó sai, ne’e fó sai kuandu ba ema sira ne'ebé halo investigasaun ruma.
“Ko’alia numera ne’e ha'u lakohi sala. Relatóriu administrasaun nian iha, maibé ami labele fó sai, tanba ne’e sekretu. So bele karik iha investigasaun ruma”, tenik nia.
Tuir nia, agora daudaun Bankada CNRT mesak mak hatama ona sira nia pozisaun hodi lakohi alienasaun karreta Prado. Tanba ne’e, administrasaun PN sei hein hela bankada sira seluk atu hato’o sira nia pozisaun atu bele hato’o ba Prezidente Parlamentu Nasionál atu bele anula.
