Esperansa públiku boot tebes ba instituisaun PNTL ne’ebé aumenta nia tinan hodi sai instituisaun ne’ebé sei servi di’ak liu tan povu Timor Leste, no ho Komando foun bele moderniza no profesionaliza liu tan instituisaun seguransa ne’e.
Prezidente Komisaun B trata asuntu Defeza, Seguransa no Negosiu Estranjeiru, Aderito Hugo povu Timor Leste presiza situasaun seguru durante oras 24 nia laran, tan ne’e importante tebes ba PNTL atu hala’o sira-nia serbisu ho profisional.
Durante ne’e, tuir Aderito polisia fraku iha kestaun atuasaun ba perturbasaun orden públika.
“Durante ne’e (polisia) identifika zona konflitu maibé atuasaun polísia nian iha area identifikadu ne’e sempre menus. Situasaun sira halo povu baibain sente la seguru no kestiona prezensa polísia nian iha terenu,” deklara Aderito iha PN, Tersa (26/03).
Maske nune’e, deputadu ne’e hein katak ho lideransa Komandante Jeral PNTL, Komisariu Faustino da Costa no Komandante Jeral daruak, Komisariu Mateus Fernandes, sei transfoma PNTL iha atuasaun no prevensaun konflitu, nune’e bele moderniza PNTL sai professional.
“Ha’u fiar katak sira nain rua bele hatene didi’ak espetativa povu ba instituisaun polísia iha efisiensia iha ninia atuasaun ba prevensaun konflitu,” dehan Aderito.
Aderito fiar katak ho prezensa figura na’in rua iha tinan haat mai bele rezolve sitasaun rai laran, no hadia erru hirak ne’ebé durante ne’e akontese.
Iha oportunidade ne’e, eis Prezidente PN ne’e fó hanoin ba Komando PNTL foun atu tau prioridade ba Ofisial Polisiamentu Suku (OPS) atu destaka iha komunidade nia leet hodi reduz konflitu.
Iha fatin hanesan, Deputadu Bankada Partidu Demokratiku (PD) Mariano Assanami Sabino fó parabéns ba aniversariu PNTL ba tinan 19.
Deputadu ne’e mós fó parabéns ba Komando foun PNTL ne’ebé sei simu pose no espera bele kontinua serbisu ne’ebé molok ne’e halo ona.
“Ha’u kongratula Komandante Jerál sesante Júlio Hornay durante nia mandate konsege halo duni mudansa balun”, dehan nia.
Ba oin, Assanami hatete, importante tebes atu konsolida PNTL hodi sai autoridade seguransa ne’ebé di’ak ba povu no nasaun.
“Ha’u husu atu konsolida instituisaun ne’e, labele fahe malu hodi harii fali kubu ida-idak iha PNTL laran,” dehan eis Ministru Agrikultura no Peska ne’e.
Tuir nia, instituisaun polisia, F-FDTL no Tribunál hanesan aliserse importante ne’ebé bele asegura paz no estabilidade, tan ne’e instituisaun hirak ne’e labele halo polítika no fahe-malu ba grupu iha instituisaun laran.
Deputada husi Bankada KHUNTO Olinda Guterres hatete, durante ne’e polisia sira serbisu maka’as hodi garantia estabilidade.
“(Polisia serbisu) la hatene loron no kalan tanba hakruk ba lei no orden,” dehan nia
Nia hatutan, dala-barak entidade sira ezije atu polisia tenke profisionál, maibé laiha motivasaun ida ne’ebé bele motiva sira hodi hala’o sira-nia knaar.
Tan ne’e, nia husu ba governu atu hasa’e salariu ba polisia sira, kria kondisaun pesoál sira atu nune’e bele moris ho dignu hanesan ajente estadu ida.
“Salariu ne’ebé agora polisia sira simu la sufisiente atu uza hodi sustenta nia moris lor-loron nian. Dala-ruma sira tenke ba halo fali servisu extra. Ne’e prezudika sira-nia serbisu nu’udar ema professional ida,” dehan nia.
Prezidente Bankada CNRT, Duarte Nunes espera katak ba oin PNTL ne’ebé eziste ona situasaun defisil bele aprende no halo buat ne’ebé di’ak liu tan.
“Ha’u fó paranbéns ba Komandante Jerál ho nia Vise. Espera katak iha nia mandatu ne’e bele halo buat di’ak ruma ba instituisaun PNTL”, dehan nia.
“Ho servisu no tempu ne’ebé mak sira liu ona tenke aprende buat barak hodi kurize, hodi hetan buat foun husi pasadu, no Komandante (foun) nain rua mós tenke aprende maka’as liu tan husi superior sira anterior nian”.
Orasaun Komisariu Julio ba Komandante Foun
Falta oras balun de’it, Julio da Costa Hornai, ne’ebé durante tinan haat nia laran assume kargu nu’udar Komandante Jeral PNTL, sei entrega nia kargu ba Komandante Jeral PNTL foun, ne’ebé nu’udar mós Komandante Daruak ne’ebé durante ne’e serbisu hamutuk ho nia.
Tuir ajenda, iha serimonia aniversariu PNTL ba dala 19 ne’ebé realize ohin, Kuarta (27/03), Komandante Jeral foun, Komisariu Faustino da Costa ho Komandante Jeral daruak Mateus Fernandes, sei simu pose hodi hala’o serbisu durante tinan haat nia laran.
Liu husi misa agradesimentu ne’ebé realiza iha Akademia Polisia Komoro, Segunda (25/03), Komisariu Julio hato’o ninia sentimentu no serbisu ne’ebé nia halo ona durante “ukun” PNTL.
“Hamrik iha ne’e hanesan Komadante Jerál, maibé hela minutu de’it ona atu remata mandate, la signifika aban remata ona ita atu la hasoru malu, ne’e laiha, ita sei nafatin hasoru malu iha fatin ida halo misa hanesan baibain,” dehan Julio.
“Ha’u mós hakarak agradese ba Mahein Santo António, ha’u-nia murak iha isnstituisaun (PNTL) ha’u sadere ba, tan ne’e ha’u oferese ha’u-nia an tomak ba iha Santo Antonio durante tinan haat nia hamutuk ho ita hotu (ho) ha’u hanesan Komadante Jerál durante tinan haat nia laran hotu ho di’ak.”
“Mahein Santo Antonio ba oin garante sei akompaiña nafatin ita, liu-liu ba Komadente Jerál Komisariu Faustino da Costa no Komadante Jerál daruak Mateus Fernandes durante mandatu iha tanan haat nia laran ho di’ak,” dehan Julio.
