CVTL sai nu’udar organizasaun independente ne’ebé estabele iha tinan 2000 no legalmente hetan rekoñesimentu husi governu nu’udar auxiliariu ba Governu Timor-Leste tuir dekretu lei nú.6/2005 iha 14 Setembru 2005.

CVTL mós proteje no uza nia emblema ho rekoñesidu hanesan membru 183 husi Movimentu Kruz Vermella no Crescente Vermelho 190 iha mundu.

Kruz Vermella iha Timor-Leste mosu ona iha dekade barak nia laran, hahú husi Kruz Vermelha Purtugés,  Kruz Vermella Indonezia (Palang Merah Indonesia-PMI), no Komite Internasionál Kruz Vermella (KICV), ne’ebé dezempeña nia papel hodi apoiu kbi’it laek sira liu husi atividade lubuk ida hanesan fornesimentu bee-moos, atividade juventude (palang merah remaja), no seluk tan.

Iha tempu okupasaun Indonezia, eziste mós Kruz Vermella iha TL ho naran Palang Merah Indonesia. Hafoin Timor-Leste ukun aan, iha 22 Juñu 2000, Timor-oan na’in 16 ne’ebé iha esperensia serbisu iha PMI deside hari’i Kruz Vermella Timor-Leste (CVTL).

Hanesan organizasaun ida, CVTL iha ninia misaun no vizaun rasik. CVTL nia misaun mak atu hadia ema ne’ebé vulneravel liu husi forsa mobilizasaun umanitariu, no ninia misaun mak servi maka’as, liu husi asaun voluntariu no fó direitu tomak ba komunidade sira hodi hadi’ak sofrimentu umanu ba dignidade moris iha Timor-Leste.

Nu’udar organizasaun, CVTL hala’o ninia kna’ar tuir idaidak nia departementu no unidade, ne’ebé kompostu husi departmentu Saúde ho unidade Responde Emerjensia; Bee no Saneamentu; Promosaun Saúde; Primeiru Sokorru ba komunidade no Primeiru Sokorru ba komersiu; Prevensaun ba HIV/SIDA; Deziminasaun; Restabelesimentu Ligasaun Familia; no Juventude.

Unidade hirak ne’e hala’o ona serbisu hanesan instala bee-moos; tulun Ministeriu Saúde hodi halo atividade doasaun ran, iha tinan 2020 CVTL foku mós iha atividade prevensaun ba Covid-19 no atividade saúde sira seluk, treinamentu primeiru sokorru ba voluntariu no komunidade benefisiariu no mos treinamentu primeiru sokorru komersial; eduka ema kona-ba HIV/SIDA; fornese Kit Primeiru sokorru; no eduka ema hotu, inklui forsa armadu, kona-ba importante kruz vermella, no papel kruz vermella durante dizastre no konflitu sivil.

Iha departementu Jestaun ba Dezastre, Preparasaun ba Dezastre no Hamenus Risku ba dezastre; povu nia moris. Ajuda ema hodi prepara ba dezastre: trainamentu ba saúde; (mudansa klimatiku, no koalia lae ba droga, MHRS, HIV/AIDS, seguru estrada no nsst).

Departementu Administrasaun, Juventude. Finansas, Lojistika, Relasaun Esterna.

Movimentu Kruz Vermella hotu-hotu no Cresente Vermlaho iha mundu tomak serbisu bazeia no lao tuir prinsípiu fundamental hitu (7) ne’ebé sai nu’udar xave importante mak: Umanidade, Imparsialidade, Neutralidade, Independensia, Unidade, Universalidade, no Serbisu Voluntariu.

“CVTL organizasaun independente ne’ebé hakarak hatutan ami-nia serbisu sira ba ema vulneravel iha rai doben Timor-Leste,  tan ne’e mai hamutuk ho ami CVTL hodi fó tulun ba maluk vulneravel sira ne’ebé merese duni atu hetan tulun. Ho prinsipiu sira ne’e halo CVTL nia servisu la haree ba rasa, kór, relijiaun, politiku, grupu ruma, maibé foku liu ba aspetu umanitariu hodi tulun ema vulneravel sira ne’ebé presiza liu,” dehan CVTL liu husi komunikadu ne’ebé jornal INDEPENDENTE asesu, Segunda (22/06).

Daudauk ne’e, CVTL nia filial iha munisipiu 12, inklui RAEOA.

Iha tinan 2020, CVTL nia staff Nasional no filial hamutuk na’in 164, inklui mós ho kasual sira, no ninia voluntariu hamutuk na’in 5.000.

“Voluntariu mak sai fuan ba CVTL.”

Parabéns ba CVTL ne’ebé eziste ona durante tinan 20 no oferese ona sira-nia serbisu ba povu Timor-Leste tomak.