''Ha'u husu ba Sarani sira hotu katak la bele fiar lia anin ne'ebé mak namkari ona iha media sosial kona-ba Amu Domingos nia mate, tanba daudaun ne'e Amo Domingos nia kondisaun iha hela médiku sira nia liman no sarani sira favor reza, la’ós espalla fali notisia falsu iha publiku,” Padre Juvito do Rego afirma ba Jornalista sira iha áreador Sala ICU, HNGV, Dili, Segunda (12/05).
Nune’e, Padre Juvito, husu sarani sira hotu tenke reza ba Amo nia kondisaun hodi entrega ba Maromak nia liman tanba esforsu hotu liu husi médiku sira.
“Ita nia orasaun importante ba Amo Domingos hodi Maromak tulun ho di’ak, la’ós hotar fali Amo Domingos iha media, ida ne'e pekadu,''nia dehan.
Padre Juvito mós husu ba média sira ne'ebé mak publika ona iha sira nia média kona ba Amu Domingos nia moras, ne’ebé médiku sira fó hela tratamentu, favor hamoos, tanba tanba Amu Kardeál la fó autorizasaun atu publika ida ne'e.
''La bele publika ida ne'e, privasidade ema nian tenke respeita dignidade hanesan ema, bainhira iha ona vunerabilidade mós nafatin respeita, tanba ne'e favor hamoos tiha buat ne'ebé imi halo ona iha média sosial,''nia hateten.
Iha sorin seluk, Diretór Servisu Apoiu Diagnostiku no Terapeutiku iha HNGV, Vidal de Jesus Lopes hateten, Padre Domingos Maubere dadaun ne'e halo hela tratamentu saúde iha sala ICU HNGV ho kondisaun grave.
“Padre Domingos Maubere mai halo tratamentu iha HNGV iha loron 8 Maiu iha sala VIP no horiseik (11/05) mak tama ba sala ICU, no agora to’o ona loron haat iha ne’e ho kondisaun kritikus tebes no tama iha faze terminadu, husi moras komplikadu ne'ebé mak Padre iha,” katak Doutor.
Nia dehan, médiku sira iha HNGV daudaun ne’e halo de’it ona kuidadu paliativu, no la bele halo buat ida ona.
“Agora daudaun uza hela makina ventilador, tanba Amu nia moras iha faze terminanasaun,'' nia relata.
Nia haktuir, Padre Domingos nia moras antes ne'e halo transferensia ba Óspital Malazia durante dala haat mais optimu, maibé moras ne'e tama ona faze terminadu. Nune’e, Óspital Malazia haruka fila fali Padre Domingos mai Timor.
“Entaun ita halo tratamentu kategoria paliativu deit, tanba tama ona faze kritiku,'' nia dehan.
Entretantu, Amu Domingos Maubere orijin husi Munisipiu Ermera ho idade 73. Atual, Amu hanesan Padre Paróku iha Igreja Sagrada Korasaun de Jesus Becora.
Enkuantu, tuir observasaun Jornalista Online INDEPENDENTE nian iha terenu hare katak, daudaun ne’e, iha áreador sala ICU marka presenza husi Bispo Deozese Baucau, Dom Leandro Maria Alves, membru Parlamentu Nasionál, Madre, padre, autoridade lokal, no sarani sira inklui familia halo orasaun ba Padre Domingos nia saúde.
