"OXFAM hamutuk ho nia parseiru sira, ami organiza semináriu ida ba parseiru no ekipa sira hotu, kona-ba direitu no dever ba servisu na’in sira iha Timor-Leste, inklui mós ita nia prosesu no sistema seguransa sosial ne'ebé organizasaun hotu no empregador sira tenke kumpri,"dehan Country Director OXFAM, Fausto Barros Ximenes iha Salaun Ótel City8, Manleuana, kuarta ne’e (09/11).

Nia hatutan, OXFAM hanesan mós organizaun internasional ida, iha ninian empregador timoroan iha rai liu no rai laran, tan ne’e importante tebes atu bele hatene traballadór ninia direitu no dever ho di'ak, bazeia ba lei ne'ebé iha.

Nune'e, iha seminariu ne’e fahe mós informasaun oinsa traballadór sira iha kuiñesimentu klean kona ba lei no regrasa sira hodi bele partisipa no kontribui ba seguransa sosial.

Ho nune'e, nia parte espera katak, ekipa no trabalhador husi OXFAM nian no mós parseiru sira ne’ebé hetan ona informasaun iha seminariu ne’e bele atualiza diak liu tan kona-ba sira nia direitu.

Country Director ne’e haktuir, OXFAM servisu hamutuk ona ho organizasaun lokal hamutuk 17, entaun rejistu ona sira nia organizasaun iha sistema seguransa sosial, no balun seidauk, balun mak rejistu no seidauk hatene ninia prosesu oinsa, entaun espera katak, liu husi seminariu ne'e, bele fó oportunidade ba sira.

Entretantu, Diretóra Ezekutivu Institutu Nasional Seguransa Sosial, Aida Maria Soares Mota hateten, seminariu ne’e atu partilla informasaun ba traballadór sira kona-ba direitu no dever, atu traballadór sira bele enskreve iha sistema seguransa sosial. Nune’e, bainhira traballadór sira tama iha risku sosiais ruma, sira labele monu ba situasaun vulneravel.

Enkuantu, partisipante sira iha seminariu ne’e mai husi Munisipiu Baukau, Líkisa, Ermera, Kovalima, Dili no mós RAEOA.