Parlamentu Nasional aprova orsamentu ba Ministériu Justisa (MJ) ho totál US$ 14.384.399, fahe bá kategória saláriu no vensimentu ho $8.417.601.
Orsamentu Béns no Servisu ho US$ 5.260.114, la prevee osan ba transferénsia públika, kapitál menór ho US$ 304.684, kapitál dezenvolvimentu ho US$ 402.000.
"Rezutadu votasaun a-favor 51, kontra 0, abstensaun 13. Nune'e orsamentu retifikativu ba Ministeriu Justisa nian pasa", dehan Prezidente Parlamentu Nasional Interina, Maria Terezina Viegas, iha PN, horisheik.
Enkuantu, PN aprova OR ba Ministeriu Justisa hare ba Sekretariu Estadu Terras no Rejistu Notariadu, PCIC no mos reforma estadu, asesu justisa inklui Funsionamentu e Dezenvolvimentu Inskonstituisional.
Molok ne'e, Ministériu Justisa (MJ) propoin orsamentu retifikativu ba Komite Revizaun Orsamentu (KRO) hodi husu adisional orsamentu atu apoiu prioridade sira iha loron 120 nia laran durante fulan lima nia laran.
Ministru Justisa, Amandio de Sa Benevidas, dehan, iha proposta OR ne'e Ministeriu Justisa husu ninia adisional orsamentu hodi bele apoiu ba Sekretariu Estadu Terras inklui Notariadu hodi bele responde ba nesidade sira liu-liu kona-ba dokumentus sira hanesan RDTL no BI no seluk tan.
"Adiosional OR Ministeriu Justisa husu para atu responde nesidade povu nian hanesan pasaporte, BI no seluk tan inklui apoiu servisu sira liu-liu ba area justisa nian no seluk tan", dehan nia.
Nia haktuir, MJ husu adisional OR refere hodi tau prioridade ba loron 120 nia lara durante fulan lima nia laran mak hanesan pasaporte, BI, servisu lejislasaun sira no area justisa nian hanesan, Tribunal, defensor publiku no seluk tan.
