Tuir Vise Prezidente Bankada Partidu Demokratiku (PD), Adriano Nacimento, José Naimori hanesan konseleiru partidu tanba ne’e hakarak atu koalia ho ministru no sekretariu estadu sira ne’ebé eleitu husi nia partidu tenke ba koalia iha sede partidu nian.

“Ha’u la preokupa kuandu Naimori hakarak ba hasoru membru governu ne’ebé eleitu husi partidu KHUNTO iha gabinete ministra ka sekretariu estadu nian ne’e la buat ida, maibé ha’u lamenta mak ministriu ne’e uza fali diretór jeral sira tara tais ba nia,” dehan Adriano iha plenaria Parlamentu Nasionál, horseik.

Haree ba faktu ne’ebé iha, deputadu ne’e konsidera ida ne’e nu’udar aktu atu politija ministriu sira.

Atu evita aktu ne’e atu akontese tan iha future, deputadu PD ne’e husu ba Parlamentu Nasional atu hahú halo ona lei protokolu governu nian nune’e sidadaun baibain ne’ebé tama ka vizita ministériu sira labele tara tais.

“Se la’e ema sidadaun baibain hothotu tama iha ne’ebá tara tais hotu, governu foti osan husi ne’ebé hodi sosa tais?,” nia kestiona.

Iha fatin hanesan, deputadu Bankada FRETILIN David Dias Ximenes Mandati hatete, José Naimori hanesan konseleiru partidu nian la’os Primeiru Ministru ne’ebé atu ba kontrola membru governu no funsionariu sira iha ministériu sira.

“Ha’u hanoin nia ba vizita membru governu husi KHUNTO nian ne’e laiha problema maibé diretór sira ba tara fali tais ne’e kona-ba saida nian?,” dehan nia.

Ba kestaun ne’e, vise Prezidente PN ne’ebé mós nu’udar deputadu husi KHUNTO, Luis Roberto hatete, vizita ne’ebé konseleiru KHUNTO halo ba nia membru sira iha kada ministeriu ne’e la’os problema ba públiku tanba nia prezensa ne’e atu motiva sira hodi halo servisu di’ak.

“Ha’u Hanoin ita iha kultura, tanba ne’e kuandu bainaka ida mai tara tais ne’e normal,” dehan nia.

Entretantu, Prezidente PN Arão Noe hatete, kona-ba lei protokolu governu nian to’o oras ne’e seidauk iha tanba ne’e iha mandatu ida ne’e husu ba deputadu sira atu foti insiativa hodi produs.