Kandidatu membru governu ne’ebé nia naran pendente hato’o kestaun ne’e liu husi konferensia imprensa iha Sede Partidu CNRT ne’ebé hetan prezensa husi lider AMP sira hanesan, Kay Rala Xanana Gusmão, Francisco Calbuadi Lay, Elder Lopes, Virgilio Smith, Jose Turquel, Antonio Verdial, Jacinto Regoberto, Sergio Lobo, Tomas Cabral, no Amandio Benevides.

Portavos kandidatura membru governu, Virgilio Smith hatete, sira na’in sia (9) ne’ebé tama lista ba estrutura VIII Governu mesak Timor-oan ne’ebé indika husi Primeiru Ministru atu hala’o funsaun públiku.

“Ami na’in sia ne’ebé hetan pendente atu la hetan tomada posse, ami hotu iha direitu siviku no politiku hanesan sidadaun ne’ebé durante ne’e seidauk simu kondenasaun ruma ne’ebé proibe atu hala’o funsaun publiku nian,” deklara Virgilio.

Tuir nia, sira na’in sia hetan lejitimidade husi Tribunal Rekursu iha momentu ne’ebé partidu CNRT no KUNTO liu husi Aliansa Mudansa ba Progresu (AMP) rejista iha Tribunal nudar kandidatu membru PN.

“Maibé parte judisiariu nian la rekuza buat ruma,” hatete nia.

Virgilio hatutan, karta ne’ebé fó sai husi gabinete PR nian ne’ebé oras ne’e daudaun publikamente iha publiku ne’ebé atu tetu fila fali naran ne’ebé PM indijita tanba alega iha prosesu judial ne’ebé la’o hela, nune’e publika mós ema nain rua dehan “perfil etiku kontroversiu”.

Kandidatura membru nain sia ne’e mós deskoñese prosesu judial ne’ebé la’o hela kontra sira-nia aan, no rekuza naran perfil etiku kontroversu tanba deskorda ho termu ne’ebé temi.

“Tanba ami rasik la hatene tanba saida mak ami hetan akuzasaun, ami rasik la hatene prosesu judisiariu kontra ami, tanba ne’e ami konsidera desrespeitu ba prinsipiu prejusaun inosensia.

Husi divulgasuan ida ne’e, nia hatutan, públiku komesa halo akuzasaun la fundamental ba kandidatu sira la ho faktus hodi kontra sira iha públiku.

“Ami-nia naran, reputasasaun no onra hetan ofensas tanba hetan akuzasaun sen faktus husi PR, nune’e ami-nia familia, feen no oan hetan ofensas no insulta husi públiku hodi bolu nauk-teen nia oan no feen,” dehan nia.

Nia hatete, akuzasaun la fundamental ida ne’e bazeia ba konteudu karta ne’ebé publika husi PR hodi hetan julgamentu popular ne’ebé la legal no justu no sai stigma sosial ba sira no familia tomak.

“Liu husi karta ida ne’e husu ba PR atu hakotu ona mal-entendidu tomak iha ami-nia leet ne’ebé iha ita-boot nia karta rasik hahú halo prezuiju boot ba ami ida-idak, familia no partidu ne’ebé ami haknar aan,” ezije Virgilio.

Tuir Virgilio, sira ne’ebé durante ne’e hetan akuzasaun la ho faktus husi PR iha direitu atu atua liu husi meiu judusial, sivil no kriminal to’o bainhira hatuur hikas fali lia loos kona-ba sira-nia naran di’ak no reputasaun.

“Husi asinante kandidatu membru governu na’in sia ne’e prontu atu kolabora hamutuk ho justisa bainhira bolu, maibé kuandu to’o tribunal mak ami inosente, laiha, sala ami mós sei ezije tuir lei atu nune’e hadia hikas ami-nia naran di’ak no reputasaun iha públiku,” deklara nia.