OMS Entrega Pakote Ai-moruk Item 121 ba MS Featured

By Adelaide dos Santos Fevereiru 11, 2024 545
Organizasaun Mundial Saúde (OMS) iha Timor-Leste entrega pakote ai-moruk item 121 emerjénsia ba Ministériu Saúde (MS) hodi responde ba jestaun moras sarampu grave. Foto:INDEPENDENTE. Organizasaun Mundial Saúde (OMS) iha Timor-Leste entrega pakote ai-moruk item 121 emerjénsia ba Ministériu Saúde (MS) hodi responde ba jestaun moras sarampu grave. Foto:INDEPENDENTE.

DILI: Organizasaun Mundial Saúde (OMS) iha Timor-Leste entrega pakote ai-moruk item 121 emerjénsia ba Ministériu Saúde (MS) hodi responde ba jestaun moras sarampu grave.

Tuir Reprezentante OMS iha Timor-Leste, Arvind Mathur hatete, ho apoiu ne’e OMS sente orgullu tebes tanba bele apoiu Ministériu Saúde liu husi aimoruk emerjénsia hodi haforsa servisu INFPM nian.

“Ohin loron ai-moruk ne’ebé ita apoiu mak pakote aimoruk emerjénsia nia, hodi jere kazu sira iha emerjénsia no foka liu ba sarampu nian, atu nune’e halo jestaun bá sarampu,” dehan nia iha INFPM, Kampung Alor, Kinta (08/02).

Nia dehan, OMS Timor-Leste entrega ona pakote ai-moruk médiku emerjénsia nian ba jestaun kazu sarampu sira ne'ebé todan. Pakote ne’e inklui ai-moruk esensiál, materiál no ekipamentu ba jestaun klinikál ba kazu sira ne'ebé suspeitu no grave.

Nia hatutan, sarampu hanesan moras respiratóriu vital ida ne’ebé iha síntoma sira hanesan inus been, mear, matan been sai no matan mean, no sinál mutin-mutin iha hasan laran.

Sarampu ne’ebé sériu dala barak akontese ba labarik ne’ebé malnutrisaun, liuliu hirak ne’ebé iha difisiénsia vitamina A, ka sira ne’ebé imunidade la forte tanba sofre HIV ka moras seluk.

Sarampu ne’ebé grave mós inklui infesaun respiratoriu, diareia grave no dehidrasaun, atake, matan-delek, no encefalitis. Ema barak ne'ebé mate tanba moras sarampu ne'e kauza husi komplikasaun hirak-ne'e, tanba ne’e vasinasaun mak dalan di'ak liu atu prevene moras sarampu.

Maske Timor-leste livre ona husi sarampu maibé bainhira mosu fali kazu foun entaun presiza preparadu ba ida ne’e no mantein nafatin estatus katak elimina ne’e preparasaun tenke iha no Aimoruk ne’e mós bele uza bá iha kazu sarampu nia no bele jere mos ba iha situasaun emerjensia no seluk tan.

Tuir OMS nia hare’e katak maske iha dezafiu maibé servisu nafatin ho Ministériu saúde no pontu fokal sir aba saude públiku husi OMS nian ne’ebé tau kada munisipiu atu nune’e bele assegura servisu OMS nian nafatin.

Iha fatin hanesan, Vise-Ministru Saúde ba Operasionalizasaun Hospitalar, Flavio Brandão informa tan katak, MS hamutuk iha ne'e hodi simu doasaun ruma ne'ebé regularmente husi OMS ka WHO suporta ba Governu Timor-Leste liuhosi Ministériu Saúde.

“OMS sensível hela ho ita-nia planu programa sira ne'ebé Ministériu Saúde lansa no ita la'o aliña malu ho suporta sira ne'ebé maka iha, tanba ne’e suporta ba governu liu-liu hare’e ba moras sarampu ne'ebe durante ne'e ita kuaze kontrola ka elimina ona moras ne'e, maibé responsabilidade bo’ot ida ba OMS mak oinsa kontinua fó suporta ba moras ida ne'e,” dehan nia.

Entaun husi ai-moruk no ekipamentu médiku ne'ebé iha hanesan suporta rutina ba servisu ne'ebé iha no moras espesífiku, nune’e uza oportunidade ida ne'e atu servisu rutina nian no halo servisu sira ne'ebé sira planeadu ona rejionál no hospitál sira, entaun ida ne'e atu hatudu katak durante ne'e kolaborasaun entre Ministeriu Saúde ho OMS la'o di'ak.

Rate this item
(0 votes)

Independente Digital TV