Sekretariu Estadu Ensinu Sekundaria Jeral no Eskola Tekniku Vokasional, Domingos Lemos Lopes informa, reprezentante OMS hand over dasi tetu ba ME atu tetu estudante sira-nia todan no aas hodi bele hatene loloos estudante sira-nia kresimentu saude.
Ekipamentu sira ne’e, nia dehan sei haruka ba eskola ensinu baziku sira iha Timor-Leste tomak.
"Ami mós sei fó formasaun ba profesor sira oinsa mak atu utiliza ba dasi tetu ida ne'e. Ekipa husi asaun sosial husi Ministériu Edukasaun sei tuir fó formasaun ba sira,” dehan nia ba jornalista sira, Tersa (21/11).
Reprezentante OMS iha Timor-Leste, Arvind Marthur hatete, monitoriu ba kresimentu estudante sira nian ne’e importante ba sira-nia bens star jeral iha futuru.
Nia hatete, edukasaun no saude nu’udar buat rua ne’ebé interligadu, tanba se saude la di’ak sei kauza rezultadu edukasaun ne’ebé la di’ak, no se edukasaun menus bele la hetan aportunidade ba saude ne’ebé di’ak liu.
“Tan ne’e, lojikamente fatin ne’ebé di’ak liu atu promove edukasaun saudavel mak eskola. Tanba ne’e, OMS kontente hodi kontinua fó nia apoiu sira ba iha eskola ne’ebé saudavel no ohin loron fornese dasi tetu no sukat a’as ba Ministeriu Edukasaun,” deklara nia.
Muda menu merenda eskolar
Investimentu boot ne’ebé durante ne’e Ministériu Edukasaun investe mak merenda eskolar. Maibé, ME seidauk hatene merenda eskolar ne’e fó nutrisaun di’ak ba estudante sira ka lae.
“Tanba ita-nia estudante sira haan hahaan ne’ebé iha maibé ita seidauk hatene sira-nia kresimentu ne’e oinsa, sira krekas ka isin aumenta ka, ita la hatene,” dehan Sekretariu Estadu Domingos.
Tan ne’e, nia dehan ho apoiu dasi tetu todan no sukat as husi OMS bele hatene labarik sira-nia kresimentu.
“Ohin OMS mai iha ME atu haree ba situasaun sira ne’e, fó apoiu ba Ministeriu Edukasaun oinsa mak labarik sira-nia nutrisaun di’ak, tanba labarik sira-nia saude di’ak, sira mós estuda di’ak.”
Aleinde ne’e, nia dehan, ME mós iha hanoin atu muda menu merenda eskolar, nune’e bele hasa’e labarik sira-nia nutrisaun.
“Husu ba dirasaun merenda eskolar, 2024 koko atu muda menu merenda eskolar ba estudante sira. Tanba kuandu hahaan la di’ak impaktu mós ba labarik sira-nia nutrisaun,” nia husu.
