Nia haktuir, Diretór SNI mak tenke fó esplikasaun ba publiku, tanba SNI halo servisu iha sira nia fatin la'ós halo patrullamentu.

"Se ida ne'e akontese  infrasaun ida grave, Diretór Nasionál SNI sei fó esplikasaun ba públiku no ba ha'u nu'udar Prezidente Repúblika," dehan  Xefi Estadu José Ramos Horta ba jornalista sira hafoin partisipa tinan 50 Revolução dos Cravos, 25 Abríl iha Salaun VIP Aeroportu Internasionál Nicolau Lobato Komoro, (03/05).

Foin dadaun rona katak elementu PSIK ida husu osan husi vitima nia família, ida ne'e desakredita instituisaun legál sira iha rai laran no halo moe Timor.

entertantu, sosiédade sivil liu husi Asia Justice And Rights (AJAR) husu atu halo teste piskolójia ba membru sira ne’ebé atu kaer arma, tantu husi autoridade polísia no SNI.

Peskizadór AJAR, Inocencio de Jesus Xavier hatete, desde uluk kedas, la'ós agora sosiédade sivil ninia pozisaun uluk kedas husu teste piskolójia ne'e, atu entrega arma ida ba autoridade polísia tantu SNI se de'it mak atu kaer arma ne'e tenke teste ninia piskolójia. Nia uza ba saida, se la'e nia problema ho nia piskolójia nia kaer arma útiliza sem iha regra, bele implika ba aktu individu ne'e bele implika ba instituisaun nia naran di'ak.

Tanba ne'e mak desde uluk kedas sosiédade sivil hanoin katak ba komandu PNTL, F-FDTL mós Diretór SNI atu haree didi'ak membru sira ne'ebé deside atu entrega arma ne'e tenke halo teste piskolójia ba sira.

"Ba asaun ne'e akontese iha Kovalima, hodi kalan foin ha'u simu kontaktu husi ita nia maluk organizasaun difisiensia ne'ebé husi aktu tiru ne'e lá'os joven ida mak hetan kanek mais difisiensia matan totál ne'e baku husi ita ninia servisu sekreta SNI nian to'o liman sorin tohar," hatete nia.

Nia esplika, oras ne'e daudauk vitima halo hela tratamentu ho sistema tradisionál iha Suai, ekipa membru FONGTIL nian fó kedas informasaun ba membru ONG sira iha Kovalima atu halo servisu buka hatene informasaun ba prosesu ne'e hodi partisipa ba Ministériu Públiku. Nune'e mós oras ne'e daudauk ekipa Sentru Komunitáriu Kovalima, no RHTO ninia ramu iha munisípiu hahú halo hela servisu, joven no intelektuais iha munisípiu agora halo hela servisu oinsá atu rekolla dadus lori prosesu ne'e ba oin.

"Ita hotu seidauk hatene kona-ba motivu husi asaun ne'e, ita hein katak komisaun investigadór ne'ebé estabelese husi PNTL bele garante ninia imparsialidade atu bele asegura vitima no suspeitu sira bele hetan justisa ida justu ba akontesimentu ne'e," hatete nia.

Antes ne'e, Deskonfia Oknum Autoridade Servisu Nasionál Intelijensia (SNI) ida Tiru Vitima Elijario Cardoso idade 20 sofre kanek grave, dadaun ne'e baixa ona iha Hospital Nasionál Guidu Valadares (HNGV) atu halo tratamentu intensivu.

Tuir informasaun ne'ebé INDEPENDENTE asesu servisu sekreta katak, insidente akontese iha loron 01 Fulan Maiu tuku 10:28 kalan, deskonfia koordenador Servisu Nasionál Intelijensia (SNI) destakadu iha Munisipiu Kovalima, nu'udar  Membru F-FDTL  husi Komponente Naval Sub-Tenente ho Inisial GSC mak envolve iha kazu tiru Joven mane ida ho naran Elijariu Cardoso idade 20 bala musan kona iha kotuk laran bokus ba kalilin rezulta kanek grave iha aldeia Wetabak, Suku Beiseiuk, Postu Administrativu Tilomar Munisipiu Kovalima.

Tanba nee vitima Elijario Cardoso sofre kanek grave, tanba bala musan konaba iha kotuk laran borus kedas ba iha kalilin parte karuk, deskonfia membru F-FDTL husi komponente naval, nuudar SNI asumi kargu hanesan koordenador SNI destakdu iha munisipiu Kovalima ho kondisaun Lanu mak tiru kanek vitima.

Ligadu ho insidente ne'e komfirma ho Komandante Jerál PNTL Komisariu Jerál Polisia Henrique da Costa hateten, kazu  pesoál Servisu Nasionál Intelénsia (SNI) neebé tiru joven ida iha Munisipiu Kovalima agora dadaun submete ona ba prosesu investigasaun.

Tanba nee Insidente nee akontese, iha kuarta (01/05) tuku 10:28 kalan deskonfia,  pesoál ida husi Servisu Nasionál Intelejensia (SNI) ho arma  tiru kanek joven ida ho naran Elijario Cordoso tinan 20 iha Munisipiu Kovalima motivu husi kazu nee seidauk hatene lolos, tanba sei iha prosesu rekolla dadus.

“Ita foin mak hetan informasaun inisiál deit katak  iha insidente ida iha Kolvalima, envolve husi ita-nia pesoál servisu sekretu ida, maibé motivu nee ita seidauk hetan, tanba  sei iha hela prosesu depois hetan mak Porta vóz Komandu PNTL sei aprezenta ba ita boot,” dehan Henrique ba jornalista sira hafoin simu vizita delegasaun  Badan Nasional Narkotika (BNN)  Repúblika Indonézia iha Kuartel Jerál PNTL Kaikoli (02/05).

 Nia dehan, bainhira akontese komandu Jerál PNTL simu informasaun orienta kedas Komandante Munisipiu Kovalima, Superintendente Polisia, Calisto Gonzaga tún direita ba halo observasaun iha fatin akontesimentu.

“Ha’u hetan kontaktu husi Komandante Munisipiu Kovalima, depois ida ne’e ita orienta kedas Komandu Munisipiu Kovalima hodi konfirma kona ba informasaun ne’ebé iha, hafoin komandu PNTL Kovalima tún ba iha terenu hodi hare, nune’e nia ho membru sira normaliza kedas situasaun iha fatin ne’ebá no identifika katak iha duni membru ida husi SNI mak envolve iha insidente ne’e,”informa nia.

Nia afirma, bainhira insidente akontese laiha asaun neebé pertuba orden públika, tanba Komandu PNTL Kolvalima ho nia membru sira asegura tiha kedas fatin akontesimentu.

“Komandu Munisipiu normaliza kedas situasaun no situasaun iha fatin akontesimentu  kontroladu,depois ida nee, ita mós informa kedas situasaun nee ba iha Diretór Jeral Servisu Nasionál Intelejensia ho mós Xefe Estadu Maiór Jenerál F-FDTL para sira mós hatene,” afirma nia.

Tanba nee Komisariu Jeral Polisia Henrique da Costa informa kazu nee SNI ida neebé mak envolve los iha insidente nee, tanba polísia sei halo hela prosesu investigasaun ba kazu nee. 

“Ha’u hakarak hateten dala ida tán ba kazu ida nee polísia agora sei halo hela prosesu investigasaun,” hakotu nia.