AJAR Aseita halo eviksaun ba restaurante iha Metiaut Featured

By Cristina Ximenes Maiu 07, 2024 516
Peskizadór AJAR, Inocencio de Jesus Xavier. Foto:Dok/INDEPENDENTE. Peskizadór AJAR, Inocencio de Jesus Xavier. Foto:Dok/INDEPENDENTE.

DILI: Asia Justice And Rights (AJAR) aseita ho Prezidente Repúblika, José Ramos Horta, kona-ba halo mós eviksaun ba restaurante sira iha área Metiaut.

Peskizadór AJAR, Inocencio de Jesus Xavier hatete, se interpreta lei metru 50 husi zona protezidu sira, lei ne’e tenke vale duni ba ema hotu-hotu.

"Ami konkorda ho Prezidente Repúblika ninia estetmentu ida ne'e, ita hein katak parte SEATOU ho ekipa ministériu relevante sira atu halo ezekusaun, lei tenke vale ba ema hotu-hotu no hanesan ba ema hotu-hotu," dehan Inocencio ba jornalista sira, iha nia kna'ar fatin, Faról, Segunda (06/05).

Atu povu ne’ebé hetan eviksaun ne’e iha satisfasaun, nia dehan, presiza halo eviksaun ne’ebé hanesan ba hotu-hotu.

Molok ne’e, Prezidente Repúblika, José Ramos Horta deklara, nia konkorda ho eviksaun, maibé labele halo de’it ba negosiante kiik sira ne’ebé buka moris iha dalan-ibun, maibé mós tenke halo ba restaurante sira ne’ebé okupa rai estadu iha area Metiaut.

Xefe Estadu ne’e dehan, eviksaun ne’ebé governu halo ba ema rihun ba rihun ne’ebé fa’an sasan iha estrada-ninin mak lakon sira-nia vida.

“Sira rihun ba rihun mak iha Dili laran, iha foho haree sira lorloron faan buat ruma atu hetan osan, duni sai tiha sira, sira lakon sira-nia rendimentu signifika governu atu halo saida ba sira?”.

"Ha'u konkorda ho eviksaun iha fatin ne'ebé ilegal maibé labele sira de'it, ita tenke eviksaun tanba fatin ne'ebé estadu nian, okupasaun ilegal iha fatin seluk, Metiaut, restaurante di'ak nakonu iha ne'ebá, ne'e mós atu halo eviksaun," deklara PR Horta ba jornalista sira iha sala VIP Aeroportu Internasionál Nicolau Lobato Komoro, hafoin partisipa tinan 50 Revolução dos Cravos, iha Portugal, Sesta (03/05).

Negosiante kiik sira, iha kada loraik fa’an batar tunu no seluk tan no kalan sira fila ba uma.

“Sira loron-loron, lokraik, sira ba ne'ebá faan batar tunu, ne'e de'it, sira la halo buat seluk, kalan sira fila ba uma, ne'e mós akontese iha Fatuhada, Meimart oin, Rotunda Nicolau Lobato, Malinamuk nakonu loos, akontese iha Audian, ne'e sira la okupa rai ida, sira halo bisnis iha ne'eba.”

Maske sei desorganizadu, maibé nune’e, tuir Horta, Prezidente Autoridade Munisípiu Dili mak tenke organiza atu permite populasaun sira ne'e kontrola tranzitu ho ijiene.

“Iha rai sira seluk mós halo nune'e, Indonézia, Tailandia, vendedor ambulante iha fatin ne'ebé Munisípiu autoriza ne'e mak devia halo,” dehan nia.

Durante tinan 22 nia laran, Horta dehan, laiha governu ida hanoin atu halo merkadu populár iha Dili. Enkuantu merkadu ne'ebé iha ne'e, hanesan Taibessi, laiha kondisaun.

“Devia halo merkadu 10 nune'e hotu-hotu iha kondisaun, garantia bee, eletrisidade, fatin ne'e luan atu ema bele bo'ok an, labele sena malu, bele proibiu labele toba iha ne'eba. Tanba balun ba ne'ebá toba tan, depois halo tan fatin ne'e hanesan uma tan fali, laiha hariis fatin loloos, nusa la kontratu kompaña ida atu kompañia ne'e halo planeiamentu?.”

“Se governu halo merkadu populár iha Dili laran tomak ne'ebé haree populasaun barak entaun halo merkadu ema la presiza halai ba estrada atu faan sasán,” dehan nia.

Rate this item
(0 votes)

Independente Digital TV