"Tuir prazu ne'ebé estabelesidu iha ita nia lei enkuadramentu Orsamentu Estadu foun, tuir kalendariu sei aprezenta ba Parlamentu Nasionál iha loron 1 Outubru tinan ne'e," dehan Diretór Jerál Orsamentu Planeamentu Ministeriu Finansas, Alexandre Soares ba jornalista sira hafoin remata enkontru ho Xefe Estadu iha Palasiu Prezidensiál Bairu-Pite, (16/09).
Antes ne'e, Ministru Finansas, Rui Augusto Gomes, aprezenta Proposta Projetu Lei Orsamentu Jeral Estadu ba Konsellu Ministrus no hetan ona aprovasaun ho montante billaun $3.1 ne’ebé Governu sei distribui ba Entidades Estadu hamutuk 109 ne’ebé mak hola parte iha perímetru orsamentál 2023.
Nia haktuir, montante globál billaun $3,1 ne’e hetan redusaun 8% ka millaun $264 kompara ho OJE Retifikativu 2022.
Totál despesas globál billaun $3,1 kompostu husi Orsamentu Administrasaun Sentrál billaun $2,8 (montante ne’e inklui ona Fundu Kombatentes Libertasaun Nasionál, billaun $1). Orsamentu Seguransa Sosiál hetan alokasaun millaun $235,7 no RAEOA millaun $120. Montante despesas globál iha PPL OJE 2023 hanesan mós ho montante despesas globál iha Lei das Grandes Opções do Plano 2023 ne’ebé mak Prezidente Repúblika, José Ramos-Horta promulga ona iha fulan-juñu liubá.
Proposta orsamentu 2023 ne’e sei uza hodi finansia Programa 49 ho medidas prinsipál 275, organizadu iha área estratéjiku 16: Agrikultura, Pekuária, Peskas no Floresta; Ekonomia no Empregu; Turizmu; Dezenvolvimentu Rural no Abitasaun; Ambiente; Petróleu no Minerál; Eletrisidade no Enerjia Renovável; Konektividade Nasionál; Bee no Saneamentu; Edukasaun no Formasaun; Saúde; Inkluzaun no protesaun Sosiál; Kultura no Patrimóniu; Reforma Estadu; Defeza no Seguransa Nasionál; Relasaun Internasionál no Polítika Esterna.
Nune'e, setór kapitál sosiál hetan aplikasaun 36%, no distribuisaun tetu Agregadu Orsamentu Administrasaun Sentrál iha OJE 2023 bazeia ba setór importante sira iha Planu Estratéjiku Dezenvolvimentu: Setór Kapitál Sosiál inklui Saúde, Edukasaun no Protesaun Sosiál hetan alokasaun millaun $771,7 ka 36%. Tuir kedan ho Setór Kuadru Institusionál ho orsamentu alokadu millaun $706,1 ka 33%. Dezenvolvimentu Infraestrutura ho orsamentu alokadu millaun $380,3 ka 18% no Dezenvolvimentu Ekonómiku ho orsamentu alokadu millaun $230,6 ka 11%.
Aliende ne'e, programa nutrisaun hetan aplikasaun orsamentu millaun $10, iha Proposta OJE 2023, Governu mós propoin ba Parlamentu Nasionál orsamentu ba Programa Nutrisaun ho montante millaun $10. Ida ne’e reprezenta aumentu kuartu vezes ka porsentu 400% kompara ho orsamentu alokadu ba programa nutrisaun iha OJE 2022.
Submisaun OJE 2023 ba PN ho aprovasaun ne’e, Governu sei finaliza Livru sira OJE inklui tabela sira no ofisialmente sei entrega PPL OJE 2023 ba Parlamentu Nasionál iha loron 3 Outubru atu diskute no aprova iha Novembru nia laran molok haruka ba Prezidente Repúblika hodi tetu.
