Molok ne’e, Prezidente Repúblika ezerse nia kompeténsia hodi veta OJE 2019 ho montante biliaun $2.1.
Hafoin vetu husi Prezidente Repúblika, Parlamentu Nasionál halo re-apresiasaun ba Orsamentu Jerál Estadu ne’ebé aprova ho votu 40 afavór no 25 kontra.
Re-apresiasaun ba OJE, hasai ona osan ho montante millaun $ 650 ho razaun alokasaun ne’e kontempla ona iha alterasaun Lei Atividade Petrolíferu ne’ebé Prezidente Repúblika promulga ona.
Nune’e, iha Kinta (7/2) Prezidente Repúblika (PR) Francisco Guterres Lu Olo, promulga Dekretu Parlamentu Nasionál nú 5/V - OJE 2019.
Iha loron hanesan, tuku 15:30 OTL, Parlamentu Nasionál (PN) simu hikas dekretu promulgadu refere husi Prezidente Repúblika.
Prezidente Parlamentu Nasionál (PPN) Arão Noé fó parabeins ba Xefe estadu Francisco Guterres Lu-Olo, tanba bele halo ona promulgasaun, hodi estabiliza hikas ezisténsia estadu ba tinan ida nia laran.
“Loraik tuku 15:30 otl, ha’u simu ona dekretu Parlamentu Nasionál númeru 5/V, Xefe estadu asina no promulga ona. Iha oras tuku 16:00 ne’e kedas, sei haruka ba gráfika nasionál atu halo publikasaun iha jornál repúblika ohin kedas”, dehan Arão iha PN horisehik.
Bainhira públika ona iha jornál repúblika, governu bele ezekuta ona orsamentu refere no Prezidente PN iha esperansa katak, iha data ikus fulan Fevereiru, bele aplika ona orsamentu normál hodi hakotu Orsamentu Duodesimál, nune’e normaliza ona sistema ezekusaun orsamentál.
Arão Noé Preokupa Ezekusaun OJE 2019
Maski, OJE 2019 hetan ona promulgasaun husi Prezidente Repúblika, maibé Prezidente Parlamentu Nasionál Arão Noé kontinua preokupa ho ezekusaun orsamentu refere tanba membru governu na'in sia seidauk simu pose.
Arão konsidera situasaun ne’e sei fó implikasaun boot ba desizaun ezekusaun OJE ne’e rasik.
Enkuantu, problema ne’ebé estadu ne’e sei enfrenta mak estrutura governu seidauk kompletu.
Maski nune’e, lider másimu órgaun lejizlativu ne’e fiar katak, iha tempu badak xefe governu iha ona desizaun ruma ba asuntu ne’e, atu labele fó impaktu ba funsionamentu governu.
Arão fó ezemplu kona-bá Ministériu Petróleu no Rekursu Minerais ne’ebé sei hasoru difikuldade boot, tanba estadu atu sosa asoins husi kompañia rua iha kampu greater sunrise, presiza ministru ida atu jere, maski ministériu ne’e responsabiliza ona husi Agio Pereira.
