Vise Koordenadór Jerál Komisaun Ezekutivu Saúde ba Surtu Covid-19, Narciso Fernandes hateten, aviaun Citilink ne’ebé aluga husi Governu sei to’o iha Timor-Leste tula traballadór sira no mós mate isin ho nia família sira hamutuk ema na’in 123.
“Fatin identifika ona, sira ne’e hotu sei halo konfinamentu obrigatóriu. Kona-ba fatin ha’u labele ko’alia iha ne’e no Ministériu Negósiu Estranjeiru Kooperasaun (MNEK) maka hatene,” dehan nia, iha edifísiu Ministériu Saúde, Kaikoli, horisehik.
Nia esplika, Ministériu Saúde sei servisu hamutuk ho Ministériu Negósiu Estranjeiru no Kooperasaun, SEPFOPE no mós ministériu relevante sira sei asegura sidadaun sira ne’e hotu.
Antes ne’e, Vise-Ministru Negósiu Estranjeiru Kooperasaun (MNEK), Julião da Silva hateten, tuir loloos traballadór no mate-isin iha Koreia Súl mai ona iha loron 30 Jullu, maibé tanba hakarak mós mate-isin ida iha Inglaterra ne’e atu mai, maka adia ba loron Kuarta (5/8).
“Ita adia fali tanba ita-nia sidadaun ida mate iha Inglaterra tenke mai dala ida,” dehan nia.
Julião dehan, daudaun kona-ba aviaun loos ona ne'ebé aluga Citilink.
“Totál traballadór 120, no mós daudaun aproxima hela mós ho Embaixada Xina atu lori mós estudante sira husi Xina mai,” tenik nia.
Nia dehan, agora mai ne’e husi Koreia sei utiliza aviaun vou Citilink tanba medida ne’e ki'ik, nune’e mai tun tuituir dalan maka governu hakarak vou direta maibé ne’e so aviaun boot.
